Pune News : पिंपरी चिंचवड : पिंपरी चिंचवड शहरातील मोशी येथील बोऱ्हाडेवाडी परिसरात आज रविवार 22 मार्च रोजी विराट हिंदू संमेलनाचे आयोजन करण्यात आले आहे. या पार्श्वभूमीवर शहरातील वाहतूक व्यवस्थेत काही महत्त्वाचे बदल करण्यात आले आहेत. मोठ्या प्रमाणावर नागरिक उपस्थित राहण्याची शक्यता लक्षात घेऊन वाहतूक कोंडी टाळण्यासाठी आणि कायदा सुव्यवस्था राखण्यासाठी पोलिसांनी विशेष नियोजन केले आहे.
हा कार्यक्रम रामा ग्रुप चौक आणि युटोपिया सोसायटीजवळील शिवरस्ता परिसरात होणार असून सायंकाळी 5 ते रात्री 10 वाजेपर्यंत काही प्रमुख मार्गांवर वाहतूक बंद ठेवण्याचा निर्णय घेण्यात आला आहे. प्रदीप स्वीट कॉर्नर ते सिल्वर गार्डेनिया सोसायटी या दरम्यानचा रस्ता सर्वसामान्य वाहनांसाठी पूर्णपणे बंद राहणार आहे. तसेच माऊली भेळ येथून सिल्वर गार्डेनिया मार्गे शिवरस्त्याकडे जाणाऱ्या वाहनांना प्रवेश दिला जाणार नाही.
वाहनचालकांनी पर्यायी मार्गांचा वापर करावा, असे प्रशासनाने सांगितले आहे. सीएनजी पंप, लक्ष्मी चौक, कुमार प्रथम सोसायटी, क्राऊन पॉईंट हॉटेल आणि कुमार लाइफस्पेस सोसायटी या मार्गांद्वारे वाहतूक वळवण्यात आली आहे. आपत्कालीन सेवा जसे की रुग्णवाहिका आणि अग्निशमन दल यांना मात्र या निर्बंधातून सूट देण्यात आली आहे.
वाहतूक शाखेकडून नागरिकांना अनावश्यक गर्दी टाळण्याचे आणि पोलिसांनी दिलेल्या सूचनांचे पालन करण्याचे आवाहन करण्यात आले आहे. परिस्थितीनुसार हे निर्बंध रात्री उशिरापर्यंत कायम राहू शकतात, त्यामुळे वाहनचालकांनी याची नोंद घेऊन प्रवासाचे नियोजन करावे.
