पुणे: आलिशान मोटारीतून मेफेड्रोन (Pune Crime) म्हणजेच एमडी हा अमली पदार्थ विक्रीसाठी (Pune News) आणणाऱ्या एका तरुणाला तळेगाव दाभाडे पोलिसांनी अटक केली आहे. या कारवाईत पोलिसांनी ड्रग्ससह मोटार, मोबाईल फोन आणि इतर साहित्य असा एकूण 24 लाख 47 हजार 300 रुपये किमतीचा ऐवज जप्त केला आहे. ही कारवाई बुधवारी रात्री तळेगाव दाभाडे येथील मनोहरनगर परिसरात करण्यात आली. (Latest Marathi News)
ओम रवींद्र आभाळे (वय 22, रा. तळेगाव दाभाडे) असे अटक करण्यात आलेल्या तरुणाचे नाव आहे. या प्रकरणी पोलीस उपनिरीक्षक मुकेश मोहारे यांनी तळेगाव दाभाडे पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, मनोहरनगरकडे जाणाऱ्या रस्त्यावर एका मोटारीतून एमडी ड्रग्स विक्रीसाठी आणले जात असल्याची गोपनीय माहिती तळेगाव दाभाडे पोलिसांना मिळाली होती. या माहितीनुसार पोलिसांनी तत्काळ सापळा रचून संशयित मोटार अडवली. मोटारीची झडती घेतली असता त्यामध्ये 39.89 ग्रॅम मेफेड्रोन हा अमली पदार्थ आढळून आला.
चौकशीदरम्यान हा अमली पदार्थ विक्रीसाठी आणल्याची कबुली आरोपीने दिल्याची माहिती पोलिसांनी दिली आहे. पोलिसांनी आरोपीकडून एमडी ड्रग्स, वापरात असलेली आलिशान मोटार, मोबाईल फोन आणि इतर साहित्य जप्त केले आहे. जप्त केलेल्या एकूण मालाची किंमत 24 लाख 47 हजार 300 रुपये इतकी असल्याचे पोलिसांनी सांगितले.
या कारवाईमुळे तळेगाव दाभाडे परिसरात अमली पदार्थांची विक्री करणाऱ्यांचे धाबे दणाणले आहेत. आरोपीकडून हे ड्रग्स कुठून आणले आणि कोणाला विक्रीसाठी होते, याचा तपास पोलीस करत आहेत. तळेगाव दाभाडे पोलीस या प्रकरणाचा पुढील तपास करत असून ड्रग्स नेटवर्कचा छडा लावण्याचा प्रयत्न सुरू आहे.
