पिंपरी-चिंचवड: पिंपरी-चिंचवड (Pimpri-Chinchwad) शहरातील कायदा आणि सुव्यवस्थेला धाब्यावर बसवत ‘कोयता गँग’ने आता पिंपळे सौदागरसारख्या उच्चभ्रू वस्तीत शिरकाव केला आहे. केवळ खाल्लेल्या केकचे पैसे मागितले म्हणून एका टोळक्याने बेकरी चालकाला शस्त्राचा धाक दाखवून लुटल्याची धक्कादायक घटना समोर आली आहे. या प्रकारामुळे शहरातील व्यापाऱ्यांमध्ये पुन्हा एकदा भीतीचे सावट पसरले आहे.
जगताप नगर, पिंपळे सौदागर येथील एका प्रसिद्ध बेकरीमध्ये गुरुवारी (26 फेब्रुवारी) रात्री सव्वा अकराच्या सुमारास ही घटना घडली. आदित्य मानवतकर, अथर्व चव्हाण आणि यश दुर्गे ही संशयित आरोपींची नावे आहेत. बेकरी चालक नौशाद अहमद नेहमीप्रमाणे आपले काम करत असताना ही मुले तिथे आली. त्यांनी दुकानातील केक घेतला, पण पैसे न देताच ते बाहेर पडू लागले.
जेव्हा नौशाद यांनी प्रामाणिकपणे आपल्या मालाचे पैसे मागितले, तेव्हा तरुणांनी केवळ हुज्जतच घातली नाही, तर नौशाद यांच्या खिशात हात घालून जबरदस्तीने पैसे काढून घेतले. आपली दहशत दाखवण्यासाठी त्यांनी सोबत आणलेला कोयता हवेत फिरवून “कोणी मध्ये आले तर याद राखा,” अशी धमकी देत परिसरात थरार निर्माण केला. भरवस्तीत रात्रीच्या वेळी घडलेल्या या प्रकारामुळे नागरिक आणि दुकानदार काही काळ सुन्न झाले होते.
पिंपरी-चिंचवडमध्ये गेल्या काही महिन्यांपासून कोयता गँगने धुमाकूळ घातला आहे. किरकोळ कारणावरून शस्त्रांचा वापर करणे ही एक गंभीर प्रवृत्ती बनत चालली आहे. पिंपळे सौदागर सारख्या आयटी हब आणि सुशिक्षित परिसरात अशा घटना घडणे, हे पोलीस प्रशासनासमोर मोठे आव्हान उभे करत आहे. जर व्यापाऱ्यांनी हक्काचे पैसे मागितले आणि त्यांना अशा प्रकारे लुटले गेले, तर व्यवसाय करायचा कसा, असा संतप्त सवाल आता उपस्थित होत आहे.
