पुणे : पुणे महापालिकेतर्फे सर्व क्षेत्रीय कार्यालयांच्या हद्दीत ‘फिडिंग स्पॉट’ तयार केले जाणार आहेत. पुणे महापालिकेच्या पशुवैद्यकीय अधिकारी डॉ. सारिका फुंडे यांनी याबाबत माहिती दिली आहे. न्यायालयाच्या निर्णयानुसार, भटक्या कुत्र्यांचे बेकायदेशी स्थलांतर दंडनीय गुन्हा आहे.
कुत्रे, मांजरांना कोणतीही व्यक्ती, संस्था, समिती परिसरातून हाकलून लावू शकत नाही. मात्र, नागरिकांना अस्वच्छतेचा सामना करावा लागू नये, यासाठी प्राणिप्रेमींनी ठरवून दिलेल्या फिडिंग स्पॉटवरच खाऊ घालावे, अशी मार्गदर्शक तत्त्वे, जागा लवकरच ठरवून दिल्या जाणार आहेत, असेही त्यांनी सांगितले.
तसेच भटक्या कुत्र्यांसाठी फिडिंग स्पॉट तयार करण्याचा मानस आहे. त्यादृष्टीने संबंधित विभाग, संस्था आणि व्यक्तींची बैठक घेतली जाणार आहे. सर्व क्षेत्रीय कार्यालयांनाही याबाबतच्या सूचना दिल्या जाणार आहेत, असेही त्यांनी सांगितले.
दरम्यान, सोसायट्या, निवासी संकुलांच्या परिसरात त्यांच्या मान्यतेने फिडिंग स्पॉट सुरू करण्याचा निर्णय घेतला जाणार आहे. त्यादृष्टीने अॅनिमल वेलफेअर बोर्ड ऑफ इंडिया, पशुसंवर्धन आणि वैद्यकीय विभाग, महापालिका आरोग्य विभाग, क्षेत्रीय कार्यालये, सोसायट्या आदींची बैठक घेतली जाणार आहे.
