जुन्नर: पुणे जिल्ह्यातील जुन्नर तालुक्यातील दुर्गावाडी परिसरातुन एक धक्कादायक घटना समोर आली आहे. येथे 40 वर्षीय तलाठी आणि 20 वर्षांची एक महाविद्यालयीन तरुणी मृतावस्थेत आढळले आहेत. 1200 फूट दरीत हे मृतदेह आढळले.
मिळालेल्या माहितीनुसार, मृत्यूपूर्वी दुर्गावाडी येथील कोकणकडा परिसरात लावलेली कार आणि त्याच परिसरात चपला आढळून आल्याने हा धक्कादायक प्रकार उघडकीस आला. याप्रकरणी जुन्नर पोलीस ठाण्यात गुन्हा दाखल करण्यात आला आहे.
रामचंद्र साहेबराव पारधी (वय 40 वर्ष) आणि रूपाली संतोष खुटाण (वय अंदाजे 20) असे मृतावस्थेत आढळलेल्या दोघांची नावे आहेत. मयत रामचंद्र हे अहिल्यानगर जिल्ह्याच्या श्रीगोंदा तालुक्यात तलाठी म्हणून कार्यरत होते. तर रुपाली ही आंबोली येथील महाविद्यालयात शिक्षण घेत होती. याबाबतची एक सुसाईड नोट पोलिसांना सापडली आहे. यामध्ये पारधी यांनी आत्महत्या का केली, याचा खुलासा केला आहे. सुसाईड नोटमाध्ये त्यांनी आपल्या पत्नीसह तिच्या घरच्यांवर गंभीर आरोपही केले आहेत.
म्हणून जगण्याची इच्छा नाही
पारधी यांनी मृत्यूअगोदर लिहिलेल्या सुसाईड नोटमध्ये पत्नी, तिच्या चुलत बहिणी, त्यांचे पती एकूण 11 जणांच्या त्रासाला कंटाळून आत्महत्या करत असल्याचं म्हटलं आहे. त्यांनी मानसिक त्रास दिल्यामुळे आपल्याला जगण्याची इच्छा नसल्याचं सुसाईड नोटमध्ये म्हटलं आहे. याबरोबरच त्यांनी पत्नीवर गंभीर आरोप केले आहेत. यामध्ये त्यांनी पत्नी लायकीची नाही. ती घरातील सर्व बाबी फोन करून इतरांना सांगते. आपण किती चांगलं आणि नवरा कसा वाईट आहे, असं नातेवाईकांना सांगून तिने माझी नातेवाईकांमध्ये बदनामी केली. मी हे 8 वर्षे सगळं सहन केलं. असं त्यांनी या सुसाईड नोट मध्ये लिहिलं आहे.
पत्नीचे तिच्या गावातील एका तरुणासोबत प्रेमसंबंध
आपल्या पत्नीचे तिच्या गावातील एका तरुणासोबत प्रेमसंबंध असल्यामुळे तिने आपल्याला कधीच मानसिक आणि शारीरिक सुख दिलं नाही, असा आरोप चिठ्ठीत त्यांनी केला आहे. तसेच पत्नीने आणि तिच्या नातेवाईकांनी माझ्या केलेल्या बदनामीमुळे आता जगण्याची इच्छा नाही. माझ्या मृत्यूला हे सर्वजण जबाबदार आहेत. त्यामुळे त्यांच्यावर कठोर कारवाई करा, असंही रामचंद्र पारधी यांनी सुसाईड नोटमध्ये म्हटलं. या सुसाईड नोटमध्ये त्यांनी आई वडील, बहीण-भाऊ आणि मुलांची माफी देखील मागितली आहे.
