Mohol Politics: सोलापूर : सोलापूर जिल्ह्याच्या राजकारणात मोहोळ आणि राजन पाटील हे नाव गेली अनेक वर्षे एकमेकांशी जोडलेले होते. मोहोळ म्हणजे राजन पाटील आणि राजन पाटील म्हणजे मोहोळ असे चित्र तयार झाले होते. मात्र गेल्या एका वर्षात झालेल्या सलग दोन निवडणुकांमध्ये राजन पाटील गटाला पराभव स्वीकारावा लागल्याने हे जुने समीकरण आता बदलताना दिसत आहे. आधी विधानसभा निवडणूक आणि त्यानंतर नगरपरिषद निवडणुकीत विरोधकांनी एकत्र येत राजन पाटील गटाला मोठा धक्का दिला आहे. Mohol Nagarparishad Election
हेही वाचा- अखेर माणिकराव कोकाटे नॉट आऊट! आमदारकी वाचली; सर्वोच्च न्यायालयाचा मोठा निर्णय
मोहोळ नगरपरिषद निवडणुकीत राजन पाटील यांच्या नेतृत्वाखाली भाजपच्या नगराध्यक्षपदाच्या उमेदवाराचा पराभव झाला. जवळपास 30 वर्षे मोहोळवर प्रभाव असलेल्या राजन पाटील यांच्या बालेकिल्ल्यात विरोधकांनी यश मिळवल्याने राज्यभरात या निकालाची चर्चा सुरू आहे. या पराभवामुळे मोहोळच्या राजकारणात मोठा बदल झाल्याचे मानले जात आहे.
पूर्वी राजन पाटील यांचे वडील बाबुराव पाटील आणि त्यानंतर स्वतः राजन पाटील यांचे मोहोळ तालुक्यावर एकहाती वर्चस्व होते. राजन पाटील हे 1995, 1999 आणि 2004 या तीन निवडणुकांमध्ये आमदार म्हणून निवडून आले होते. 2009 मध्ये मोहोळ विधानसभा मतदारसंघ अनुसूचित जातीसाठी राखीव झाला. तरीही या मतदारसंघावर पाटील यांचा प्रभाव कायम राहिला.
2009 मध्ये लक्ष्मण ढोबळे, 2014 मध्ये रमेश कदम आणि 2019 मध्ये यशवंत माने हे राजन पाटील समर्थक आमदार निवडून आले होते. मात्र 2024 च्या विधानसभा निवडणुकीत पाटील गटाला पहिला मोठा धक्का बसला. या निवडणुकीत विरोधकांनी एकजूट दाखवत शरद पवारांच्या राष्ट्रवादीचे उमेदवार राजू खरे यांना विजयी केले. त्यामुळे राजन पाटील समर्थक यशवंत माने यांचा पराभव झाला.
मोहोळ नगरपरिषद निवडणुकीत भाजपमध्ये प्रवेश केलेल्या राजन पाटील यांना रोखण्यासाठी सर्वपक्षीय विरोधकांनी अनोखी रणनीती आखली. आमदार राजू खरे हे शरद पवार गटातून निवडून आले असून, उमेश पाटील हे अजित पवारांच्या राष्ट्रवादीचे जिल्हाध्यक्ष आहेत. या दोन्ही नेत्यांनी आपल्या पक्षाचे उमेदवार न देता शिवसेनेचे रमेश बारस्कर यांच्या माध्यमातून पॅनल उभे केले.
मोहोळचं राजकारण बदललं
राजू खरे आणि उमेश पाटील यांच्या मार्गदर्शनाखाली तसेच रमेश बारस्कर यांच्या नेतृत्वात शिवसेनेच्या धनुष्यबाण चिन्हावर उमेदवार उभे करण्यात आले. या पॅनलने सर्वसामान्य कुटुंबातील उच्चशिक्षित 22 वर्षीय सिद्धी वस्त्रे यांना नगराध्यक्षपदाची उमेदवारी दिली. तरुण चेहरा आणि एकत्रित विरोधकांची ताकद यामुळे भाजपला मोहोळमध्ये मोठा पराभव स्वीकारावा लागला असून, मोहोळच्या राजकारणात नवे पर्व सुरू झाल्याचे चित्र दिसत आहे.
