न्हावरे(शिरूर): न्हावरे (ता.शिरूर) येथील ट्रॅक्टर चोरीच्या गुन्ह्याचा शोध लावून दोन आरोपींना स्थानिक गुन्हे शाखेने अटक केली. आरोपींकडून चोरीस गेलेला ट्रॅक्टर व कल्टीवेटर यंत्र असा सुमारे दोन लाख रुपयांचा मुद्देमाल जप्त केला आहे.
समीर बापू कुंजीर(वय- 21 वर्ष) आणि निखिल दत्तात्रय ठाकर (वय- 22 वर्ष, दोघेही रा.टाकळी भिमा, ता.दौंड, जि.पुणे) अशी ट्रॅक्टर चोरी प्रकरणातील आरोपींची नावे असून या दोघा आरोपींना स्थानिक गुन्हे शाखेने बाबुरावनगर, शिरूर येथून अटक केली आहे. आरोपींनी गुन्हा कबूल केल्यामुळे स्थानिक गुन्हे शाखेने त्यांना ताब्यात घेतले व शिरूर न्यायालयासमोर हजर केले असता, न्यायालयाने आरोपींना पोलीस कोठडी सुनावली आहे.
निलेश प्रकाश कोरेकर (वय- 40 वर्ष, रा.न्हावरे, ता.शिरूर, जि.पुणे) यांनी 1 मार्च रोजी ट्रॅक्टर चोरीची फिर्याद शिरूर पोलीस ठाण्यात दिली होती. त्यावरून स्थानिक गुन्हे शाखेने सीसीटीव्ही फुटेज व गोपनीय माहितीच्या आधारे तपास करून आरोपींना अटक केली. त्याचप्रमाणे न्हावरे परिसरातून दुचाकी गाड्या व इतर छोट्या-मोठ्या चोऱ्या झालेल्या आहेत. त्याचा पोलिसांनी पकडलेल्या आरोपींशी काही संबंध आहे का? याचाही शोध पोलीस घेत आहेत.
उपविभागीय पोलीस अधिकारी प्रशांत ढोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर यांच्या पथकाने संबंधित घटनेचा तपास केला.
