जुन्नर: जुन्नर शहराजवळील इदगाह (Junnar News) मैदानाच्या परिसरात शनिवारी (Pune News) घडलेल्या दुर्घटनेमुळे हळहळ व्यक्त केली जात आहे. इस्लामपुरा, खडकवस्ती येथे राहणारे दोन सख्खे भावंडे आफान अफसर इनामदार वय 10 आणि रिफत अफसर इनामदार वय 7 शेततळ्यात बुडून मृत्यूमुखी पडले.
शनिवारी दुपारी सुमारे 4 वाजल्यापासून दोन्ही मुले घरी परतली नाहीत, तेव्हा त्यांच्या आईला त्यांचा शोध लागत नव्हता. त्यांनी तात्काळ जुन्नर पोलिसांना माहिती दिली. मुलांच्या नियमित खेळायच्या जागीही ते दिसून आले नाहीत. त्या परिसरात बिबट्याचा वावर असल्याने पोलिसांसोबत वन विभागाचे पथकही शोध मोहिमेत सहभागी झाले. ड्रोनच्या मदतीने शोध सुरू असताना शेततळ्याच्या काठावर मुलांचे बूट आणि चप्पल आढळले.
यानंतर रात्री सुमारे 9.30 वाजता शेततळ्यात शोध घेतला असता दोन्ही भावंडे पाण्यात बुडाल्याचे आढळले. तातडीने त्यांना पाण्याबाहेर काढून जुन्नर रेस्क्यू टीमच्या रुग्णवाहिकेतून शिवछत्रपती रुग्णालयात नेण्यात आले. वैद्यकीय अधिकारी डॉ. जाहिद हसन यांनी तपासणी केल्यानंतर मुलांचा मृत्यू चार तासांपूर्वीच झाल्याचे स्पष्ट झाले.
घटनेची माहिती मिळताच रुग्णालय परिसरात नागरिकांची गर्दी झाली होती. पोलिस निरीक्षक किरण अवचर, वन विभागाचे वनपरिक्षेत्र अधिकारी प्रदीप चव्हाण आणि संबंधित विभागाचे कर्मचारी घटनास्थळी उपस्थित होते.
