पोपट पाचंगे
रांजणगाव गणपती: रांजणगाव गणपती येथील युवा उद्योजक विजय दत्तोबा लांडे यांची कन्या ऐश्वर्या आणि निमगाव भोगी (ता.शिरूर) येथील माजी सैनिक राजाराम सांबारे यांचे सुपुत्र विशाल या उच्चशिक्षित तरुणांनी अमेरिकेतील डलास शहरात पारंपरिक हिंदू वैदिक पद्धतीने विवाहबद्ध होत आपल्या समृद्ध मराठी संस्कृतीचा परदेशातही जागर केला. या विवाह सोहळ्याचे सध्या सर्वत्र कौतुक होत आहे.
या विवाह सोहळ्याची सुरुवात सीमंत पूजनाने झाली. यानंतर पारंपरिक मराठमोळ्या पद्धतीने साखरपुडा, नंतर सर्व वधू पक्ष व वर पक्षातील महिलांनी पारंपारिक वाद्यांच्या गजरात वधू आणि वराला हळद लावली. नंतर वराची परण्या मिरवणूक काढण्यात आली. विवाहप्रसंगी नवदांपत्याने महाराष्ट्रीयन परंपरेनुसार वेशभूषा परिधान केली होती. वेदमंत्रांच्या पठणात व मंगलाष्टकांच्या जयघोषात विवाह विधी पार पडला. यानंतर होम-हवन, सप्तपदी व कन्यादान यांसारखे सर्व धार्मिक विधी नितांत श्रद्धेने व शिस्तबद्धतेने अमेरिकेच्या भूमीत मराठमोळा उत्सव पार पडले.
यावेळी दोन्ही कुटुंबीय, नातेवाईक, मित्रपरिवार तसेच अमेरिकास्थित भारतीय नागरिक उपस्थित होते . लग्नानंतर उपस्थित पाहुण्यांनी महाराष्ट्रीयन पद्धतीच्या स्वादिष्ट भोजनाचा आस्वाद घेतला. या सोहळ्याच्या माध्यमातून भारतीय संस्कृतीचा गौरव पुन्हा एकदा अमेरिकेच्या भूमीत अनुभवता आला असून, मराठमोळ्या परंपरेचा अभिमानही जागविण्यात आल्याचे वधूपिता उद्योजक लांडे यांनी सांगितले.
