शिरूर: करंजवणे (ता. शिरूर) येथील रहिवासी व ट्रान्सपोर्ट व सप्लायचा व्यवसाय करणारे संदेश लहु शेलार (वय 40 यांच्यावर शिरूर तालुक्यातील करडे गावाजवळ दगडफेक करून प्राणघातक हल्ला करण्यात आला. या प्रकरणी पवन दिलीप घुले (रा. करडे) व अन्य चार अनोळखी इसमांविरोधात शिरूर पोलीस ठाण्यात गुन्हा दाखल करण्यात आला आहे. ही घटना 20 ऑगस्ट 2025 रोजी रात्री 10.30 वाजता घडली.
संदेश शेलार यांनी प्लांटची बाकी रक्कम मागण्यासाठी पवन घुले याला फोन केला असता, त्याने उर्मट भाषेत बोलून धमकी दिली की, “प्लांटवर आलास तर तुला मारून टाकीन.” त्यानंतर शेलार यांनी दुसऱ्या भागीदार अर्जुन काळे याच्याशी संपर्क साधून, त्याच्या सांगण्यावरून प्लांटवर गेले.
शेलार हे त्यांचे मित्र स्वप्निल शिंदे व निलेश फड यांच्या सोबत गाडी (एम. एच. 12 यू. एफ. 9613 घेऊन आर.एम.सी. प्लांटवर गेले असताना, चार अनोळखी व्यक्तींनी त्यांच्या गाडीवर दगडफेक करून गाडीचे नुकसान केले. यावेळी पवन घुले याने स्वतः गाडीच्या डाव्या बाजूला दगडफेक करून शेलार यांच्या डाव्या गालावर डोळ्याजवळ मारहाण केली. या हल्ल्यात त्यांना गंभीर दुखापत झाली असून, गळ्यातील चार तोळ्यांची सोन्याची चैन तुटली आणि कपडे फाटले. त्यानंतर आरोपींनी शिवीगाळ करत जिवे मारण्याची धमकी दिली.
या प्रकरणी शिरूर पोलीस ठाण्यात गु.र.नं. 604/2025 अन्वये भारतीय दंड विधान कलम 118(1), 324(4), 351(2)(3), 352, 189(2), 191(2), 190, 351(4) प्रमाणे गुन्हा दाखल करण्यात आला आहे.
पोलीस हवालदार पवार यांनी फिर्याद नोंदवली असून, तपास पो.नि. बनकर हे करत आहेत.
