ओमकार भोरडे
तळेगाव ढमढेरे : शिरूर तालुक्यातील नागरगाव फाटा येथे कार व कंटेनरचा अपघात झाल्याची घटना घडली आहे. या अपघातात एका व्यक्तीचा मृत्यू झाला आहे, तर एक जण गंभीर जखमी झाला आहे. ही घटना ५ ऑगस्ट रोजी सकाळी शिरुर-सातारा राज्य महामार्गावर नागरगाव फाटा येथील हॉटेल अन्नपुर्णा समोर घडली आहे.
मनोजकुमार सोन्याबापू औटी (वय-३२, रा. राळेगणसिध्दी, ता. पारनेर, जि. अहमदनगर) असं अपघातात मृत्यू झालेल्या व्यक्तीचे नाव आहे, तर सागर रावसाहेब भूजबळ (रा. भुजबळ वस्ती, नाशिक रोड पोहेगाव, ता. कोपरगाव, जि. अहमदनगर) असे गंभीर जखमी झालेल्या व्यक्तीचे नाव आहे .
याबाबत लाभेश गणपतराव औटी (वय-३९, व्यवसाय शेती, राळेगणसिद्धी, ता. पारनेर, जि. अहमदनगर) यांनी पोलीस ठाण्यात फिर्याद दिली आहे. त्यावरून कंटेनर चालक दत्ता चांगदेव सोनवणे (रा. किनगाव, ता. अहमदपुर, जि. लातुर) याच्यावर गुन्हा दाखल करण्यात आला आहे.
पोलीसांनी दिलेल्या माहितीनुसार, शिरूर तालुक्यातील नागरगाव गावच्या हद्दीतील नागरगाव फाटा येथील हॉटेल अन्नपुर्णा समोर हा अपघात झाला आहे. कंटेनर चालक दत्ता सोनवणे हा कंटेनर (एन. एल. 01 ए-ई 8252) भरधाव वेगात चालवत पुढे जात असताना स्विप्ट कार (एम. एच. 12 एच. झेड 7577) यामधुन जात असलेल्या मनोजकुमार औटी यांना जोरदार धडक दिली.
या अपघातामध्ये औटी यांच्या डोक्याला गंभीर दुखापत झाल्याने त्यांचा जागीच मृत्यु झाला, तर सागर भूजबळ हे गंभीर जखमी झाले असून त्यांना रुग्णालयात दाखल करण्यात आले आहे. यासंदर्भात लाभेश औटी यांनी दिलेल्या फिर्यादीवरून कंटेनर चालक सोनवणे याच्यावर गुन्हा दाखल करण्यात आला असून पुढील तपास पोलीस निरीक्षक जोतीराम गुंजवटे यांच्या मार्गदर्शनाखाली सहाय्यक फौजदार कदम करत आहेत.
