लोणी काळभोर, (पुणे) : यवत व भिगवण पोलीस ठाण्याच्या हद्दीतून मोबाईल चोरून त्यांची विक्री करण्यासाठी आलेल्या दोघांना स्थानिक गुन्हे शाखेच्या (ग्रामीण) पोलिसांनी वरवंड (ता. दौंड) ग्रामपंचायत हद्दीतील पुलाखालून ताब्यात घेतले आहे.
निलेश गणेश गोरे (वय – २२, रा. खंडोबा नगर बारामती), व आकाश दत्ता सोनवणे वय -२२ रा. बारामती ता. बारामती) असे ताब्यात घेण्यात आलेल्या दोघांची नावे आहेत.
स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर यांनी दिलेल्या माहितीनुसार, स्थानिक गुन्हे शाखेचे पथक यवत पोलीस ठाण्याच्या हद्दीत गस्त घालीत असताना गोपनीय बातमीदारा मार्फत बातमी मिळाली की यवत पोलीस ठाण्याच्या हद्दीतून चोरीला गेलेला मोबाईल निलेश गोरे याचेकडे असून तो त्याचे साथीदारासह वरवंड येथील पूला जवळ येणार आहे.
मिळालेली माहितीच्या अनुषंगाने पोलिसांच्या पथकाने वरवंड पुलाजवळ जावुन सापळा रचला. यावेळी दोन ईसम मोटरसायकल वरून येताना दिसले. त्यापैकी मोटरसायकल चालवणारा निलेश गोरे असल्याची खात्री झाल्याने दोघांना ताब्यात घेऊन नावे विचारले असता त्यांनी त्यांची नावे वरीलप्रमाणे सांगितली. दोघांची झडती घेतली असता निलेश गोरे यांच्याकडे चोरीचा मोबाईल मिळून आला त्याचा कोड चेक केला असता तो यवत पोलीस स्टेशन हद्दीतील चोरीस गेलेला मोबाईलशी मिळून आला.
दरम्यान, त्यांच्याकडे अधिक चौकशी केली सदरचा गुन्हा केल्याची कबुली दिली असून त्यांनी भिगवन पोलीस ठाण्याच्या हद्दीतून सुद्धा गुन्हा केल्याची कबुली पोलिसांना दिली आहे. दोघांची अटकपूर्व वैद्यकीय तपासणी करून पुढील तपासासाठी यवत पोलीस ठाण्याच्या ताब्यात दिले असून गुन्ह्याचा अधिक तपास पोलीस उपनिरीक्षक नागरगोजे करीत आहेत.
सदरची कारवाई स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर यांचे मार्गदर्शनाखाली सहायक पोलीस निरीक्षक राहुल गावडे, कुलदीप संकपाळ सहायक पोलीस उपनिरीक्षक बाळासाहेब कारंडे, पोलीस हवालदार सचिन घाडगे, अजित भुजबळ, असिफ शेख, अजय घुले, राजू मोमीन, अभिजीत एकशिंगे, स्वप्निल अहिवळे, अतुल डेरे, निलेश शिंदे, मुकुंद कदम यांनी केली आहे.
