Crime News : पुण्याच्या वारजे परिसरात एक अत्यंत दुर्दैवी घटना घडली आहे. एका आईने आपल्या दोन वर्षांच्या चिमुकल्या मुलीचा जीव घेतल्यानंतर स्वतःही जीवन संपवल्याचे समोर आले आहे. मुलीच्या गंभीर आजारामुळे आलेल्या मानसिक तणावातून हे टोकाचे पाऊल उचलल्याचा प्राथमिक अंदाज आहे.
वारजे माळवाडीतील गोकुळनगर पठार भागात आदिनाथ देवडकर हे पत्नी छाया (वय २८) आणि दोन वर्षांची मुलगी शारवीसोबत राहत होते. शारवीला जन्मत:च हाडांचा गंभीर आजार होता आणि तिच्यावर उपचार सुरू होते. मात्र, या आजारामुळे आई छाया सतत चिंतेत आणि नैराश्यात होती.
शुक्रवारी दुपारी आदिनाथ कामावरून घरी आले असता घरात हृदयद्रावक दृश्य दिसले. चिमुकली शारवी हालचाल न करता पडलेली होती, तर छायानेही आपले जीवन संपवले होते. घटनेची माहिती मिळताच पोलिसांनी घटनास्थळी धाव घेतली.
या प्रकरणी पोलिसांनी नोंद घेतली असून पुढील तपास सुरू आहे. एका आनंदी कुटुंबावर अचानक ओढवलेल्या या दु:खद प्रसंगामुळे संपूर्ण परिसरात शोककळा पसरली आहे.
