Crime : पुण्यात ऑनलाइन कॅब बुक करून चालकाची निर्घृण हत्या केल्याची धक्कादायक घटना उघडकीस आली असून, खूनानंतर कार विकून पुरावे नष्ट करण्याचा कटही पोलिसांनी उधळून लावला आहे. रायगड जिल्ह्यातील माणगाव हद्दीत घडलेल्या या प्रकरणात तिघांना अटक करण्यात आली असून, मुख्य आरोपीला रेल्वे प्रवासादरम्यान अटक करण्यात पोलिसांना यश आलं आहे. (Crime)
आदित्य गणेश भगत (वय २२, रा. भोसरी) असे खून झालेल्या तरुण कॅब चालकाचे नाव आहे. आदित्य याने ऑनलाइन कॅब बुकिंगद्वारे पुण्यातून प्रवास सुरू केला होता. सहलीसाठी महाबळेश्वरकडे जात असताना पैशाच्या वादातून प्रवासातच तिघा आरोपींनी त्याचा गळा आवळून खून केल्याचं तपासात निष्पन्न झालं आहे. खून केल्यानंतर आरोपींनी ताम्हिणी घाट परिसरात मृतदेह फेकून देत घटनास्थळावरून पलायन केलं.
काही दिवसांनी ताम्हिणी घाटात सणसवाडीच्या हद्दीत मृतदेह आढळून आला. ओळख पटवणं अवघड असतानाच मृताच्या हातातील घड्याळाच्या आधारे पोलिसांना आदित्य भगत याची ओळख पटवण्यात यश आलं. त्यानंतर माणगाव पोलीस ठाण्यात खुनाचा गुन्हा दाखल करण्यात आला.
दरम्यान, खून केल्यानंतर आरोपी कार विकण्याच्या तयारीत असल्याची माहिती बाणेर पोलिसांना मिळाली. पोलिस कर्मचारी प्रीतम निकाळजे यांच्या पथकाने मुंबई-बेंगळुरू बाह्यवळण मार्गावरील ननावरे पुलाजवळ सापळा रचत अनिकेत वाघमारे याला अटक केली. त्याच्याकडून कार जप्त करण्यात आली. चौकशीत त्याने तुषार पाटोळे आणि प्रज्वल उर्फ सोन्या हंबीर यांच्यासोबत खून केल्याची कबुली दिली.
मुख्य आरोपी प्रज्वल हंबीर हा फरार असून सोलापूरहून पुण्याकडे रेल्वेने येत असल्याची माहिती मिळताच पुणे व दौंड लोहमार्ग पोलिसांनी संयुक्त कारवाई करत इंद्रायणी इंटरसिटी एक्स्प्रेसमधून त्याला अटक केली. सर्व आरोपींना पुढील तपासासाठी माणगाव पोलिसांच्या ताब्यात देण्यात आलं आहे.
ही घटना ऑनलाइन कॅब चालकांच्या सुरक्षेचा गंभीर प्रश्न पुन्हा एकदा ऐरणीवर आणणारी ठरली असून, निष्पाप तरुणाचा जीव केवळ पैशाच्या वादातून गेला, यामुळे सर्वत्र संताप व्यक्त केला जात आहे.
