पुणे: मुंढवा परिसरातील (Parth Pawar Land Scam Case) तब्बल 40 एकर जमिनीच्या (Pune News) व्यवहारावरून मोठा वाद निर्माण झाला आहे. पार्थ पवार (Breaking News) यांच्या अमेडिया कंपनीशी संबंधित या व्यवहारात शासनाच्या मुद्रांक शुल्कात फसवणुकीचा प्रकार उघडकीस आला असून, त्यावरून तीन जणांविरुद्ध गुन्हा दाखल करण्यात आला आहे. सह जिल्हा निबंधक (वर्ग 1) संतोष अशोक हिंगाणे यांनी बावधन पोलिस ठाण्यात दिलेल्या तक्रारीनुसार ही कारवाई करण्यात आली आहे. या तक्रारीत जमीन विक्रेती शीतल तेजवानी, अमेडिया कंपनीतील भागीदार दिग्विजय पाटील आणि सह दुय्यम निबंधक रवींद्र तारु यांची नावे नमूद आहेत.
या प्रकरणामुळे राजकीय वातावरणात खळबळ उडाली आहे. विरोधकांनी पार्थ पवार यांचे नाव एफआयआरमध्ये का समाविष्ट करण्यात आले नाही आणि त्यांच्यावर कारवाई का झाली नाही, असा प्रश्न उपस्थित केला आहे. दरम्यान या प्रकरणात नवी माहिती समोर आली असून, जमीन खरेदी प्रकरणात पार्थ पवार यांच्यावरही गुन्हा दाखल होण्याची दाट शक्यता असल्याची माहिती समोर येत आहे. त्यामुळे उपमुख्यमंत्री अजित पवार यांच्या अडचणी वाढण्याची शक्यता व्यक्त केली जात आहे.
वादग्रस्त जमीन खरेदी प्रकरणात संबंधित अमेडिया कंपनीचे कायदेशीर अधिकार सध्या दिग्विजय पाटील यांच्या नावावर आहेत. मात्र पुढील तपासात कंपनीमध्ये संचालक पदावर असणारे पार्थ पवार यांच्यावरही गुन्हा दाखल होऊ शकतो, अशी शक्यता व्यक्त केली जात आहे. पार्थ अजित पवार यांनीच मूळ शासकीय जमीन खरेदी केली असल्याचे पुरावे तपास यंत्रणेला मिळाल्याचे सांगण्यात येते. त्यामुळे कंपनीत पदावर असताना व्यवहार झाल्याने त्यांच्यावरही गुन्हा दाखल करण्याची प्रक्रिया पुढे जाऊ शकते.
अधिक तपासात पार्थ पवार यांचे नाव स्पष्टपणे समोर आल्यास त्यांना अतिरिक्त आरोपी म्हणून एफआयआरमध्ये समाविष्ट करता येईल, अशी माहितीही सूत्रांनी दिली आहे. याबाबत संबंधित अधिकाऱ्यांकडून प्राथमिक चौकशी सुरू असून, पार्थ पवार यांच्या सही त्या काळातील दस्तावेजांवर असल्याचेही समोर आले आहे. सध्या या प्रकरणात पार्थ पवार यांच्याकडे कंपनीचे अधिकार नसले तरी, जमीन खरेदीच्या काळात ते संचालक पदावर होते, हे नोंदीत आहे. कायदेशीर तरतुदीनुसार त्यांना अतिरिक्त आरोपी म्हणून समाविष्ट करण्याचा विचार तपास पथक करत आहे.
या प्रकरणात सुरुवातीला पार्थ पवार यांचे नाव वगळण्यात आल्याने विरोधकांनी तीव्र प्रतिक्रिया दिली होती. तात्पुरता दिलासा मिळाल्यासारखे वाटत असले तरी, आगामी काळात पार्थ पवार यांच्या अडचणीत वाढ होण्याची शक्यता वर्तवली जात आहे, कारण तपासाच्या पुढील टप्प्यात त्यांच्यावरही गुन्हा दाखल होऊ शकतो, अशी विश्वसनीय सूत्रांकडून मिळालेली माहिती आहे.
