ओमकार भोरडे
रांजणगाव: रांजणगाव एमआयडीसी पोलिस स्टेशनच्या एका धाडसी मोहिमेमुळे गेल्या काही महिन्यांपासून अपहरण झालेली अल्पवयीन मुलगी सुखरूप सापडली असून, प्रमुख आरोपीस शिताफीने अटक करण्यात आली आहे. या कारवाईत महिला पोलिस हवालदार विद्या बनकर यांनी दाखवलेल्या धाडसाची विशेष प्रशंसा होत आहे.
नोव्हेंबर 2024 मध्ये रांजणगाव एमआयडीसी पोलिस ठाण्यात एका अल्पवयीन मुलीच्या अपहरणाची तक्रार दाखल झाली होती. तपासाची जबाबदारी महिला हवालदार विद्या बनकर यांच्यावर सोपवण्यात आली होती. गेल्या अनेक महिन्यांपासून त्या या प्रकरणाचा सातत्याने पाठपुरावा करत होत्या. काही दिवसांपूर्वी आरोपी संतोष मुळे (रा. खोरस, ता. पालम, जि. परभणी) परभणी जिल्ह्यात असल्याची गोपनीय माहिती बनकर यांना मिळाली.
त्यानंतर, बनकर यांनी पोलिस हवालदार वैभव मोरे यांच्या मदतीने तातडीने परभणी गाठले. प्रतिकूल परिस्थितीतही नदी-नाले ओलांडत त्यांनी धाडसी पाठलाग केला आणि आरोपीस पकडण्यात यश मिळवले.
तपासादरम्यान आरोपी गुन्हा मान्य करायला तयार नव्हता. मात्र पोलिस कॉन्स्टेबल उमेश कुतवळ यांच्या तांत्रिक तपासामुळे आरोपीच्या नातेवाईकांनीही माहिती द्यायला सुरुवात केली आणि अखेर संतोष मुळे याने गुन्ह्याची कबुली दिली. त्यानुसार अपहरण केलेली मुलगी लातूर येथे असल्याचे उघड झाले.
त्यानंतर आरोपीला रात्रीच परभणीतून ताब्यात घेण्यात आले आणि पहाटेच्या सुमारास पोलिसांनी लातूर गाठत अल्पवयीन मुलीला सुखरूप शोधून काढले.
या धाडसी मोहिमेमुळे रांजणगाव एमआयडीसी पोलिस स्टेशनचे पोलिस निरीक्षक महादेव वाघमोडे यांनी हवालदार विद्या बनकर, हवालदार वैभव मोरे आणि कॉन्स्टेबल उमेश कुतवळ यांचे अभिनंदन केले. तसेच संपूर्ण पोलिस ठाण्याच्या वतीने त्यांना गौरवण्यात आले.
दरम्यान, या प्रकरणात बलात्कार व बाल लैंगिक अत्याचार प्रतिबंधक कायद्यानुसार (POCSO Act) गंभीर गुन्ह्यांची नोंद करण्यात आली आहे. या प्रकरणाचा पुढील तपास पोलीस उपनिरीक्षक शिवाजी मुंढे करत आहेत.
