विशाल शिंदे
भोर: राजगड पोलीस ठाण्याच्या हद्दीत पुन्हा एकदा तांब्याच्या तारा चोरीची घटना उघडकीस आली आहे. मौजे दिडघर गावच्या हद्दीतील स्मशानभूमीजवळील 100 के.व्ही.ए क्षमतेच्या रोहीत्रातून तब्बल 54 हजार रुपयांच्या तांब्याच्या तारा अज्ञात चोरट्यांनी लंपास केल्या आहेत.
ही घटना 15 ऑगस्टच्या रात्री 11 वाजल्यापासून ते 16 ऑगस्टच्या सकाळी 8.30 वाजेपर्यंत घडली. याबाबत फिर्याद महेश संपत बांदल (वय 34, रा. सांगवी भाटघर, ता. भोर) यांनी राजगड पोलिस ठाण्यात नोंदवली आहे.
फिर्यादी यांनी दिलेल्या माहितीनुसार, दिडघर येथील स्मशानभूमीजवळील डी.पी. क्र. 4058070 असलेले रोहीत्र अज्ञात चोरट्याने खाली पाडून त्यामधील ऑईल सांडवून मोठे नुकसान केले. त्यानंतर त्यातील 90 किलो वजनाच्या तांब्याच्या काईल तारा, किंमत 54,000 रुपये, चोरून नेल्या.
या घटनेमुळे परिसरातील नागरिकांमध्ये भीतीचे वातावरण निर्माण झाले असून, वारंवार होणाऱ्या तांब्याच्या तारा चोरीच्या घटनांवर पोलिसांनी कठोर पावले उचलावीत अशी मागणी होत आहे. पुढील तपास राजगड पोलीस स्टेशन करत आहे.
