भिगवण : तक्रारवाडी गावातील जिल्हा परिषद शाळेच्या वर्गखोलीचे भूमिपूजन भगवानराव भरणे प्रतिष्ठानच्या कार्याध्यक्षा अनुष्का भरणे यांच्या उपस्थितीत पार पडले. तक्रारवाडी शाळा हि इंदापूर तालुक्यातील केंद्र शाळा असून या शाळेत जवळपास ४५० च्यावर विद्यार्थी शिक्षण घेत आहेत. हे विद्यार्थी माती दगडात बांधलेल्या आणि पत्र्याच छत असणाऱ्या वर्गखोल्यात आपले शिक्षण घेत आहेत.
या जुन्या काळात बांधण्यात आलेल्या शाळा खोल्या आज धोकादायक स्थितीत असून नवीन खोल्या मिळाव्यात, यासाठी तक्रारवाडी ग्रामपंचायत पदाधिकारी, राजकीय कार्यकर्ते आणि ग्रामस्थांकडून मागणी करण्यात आली होती. अखेर राज्याचे कॅबिनेट मंत्री दतात्रय भरणे यांनी जिल्हा नियोजन समितीच्या माध्यमातून पहिल्या टप्प्यात १ आणि पुढील टप्प्यात १४ खोल्या मंजूर केल्या आहेत. याच विकास कामाचे भूमिपूजन अनुष्का भरणे यांच्या हस्ते करण्यात आले आहे.
यावेळी बोलताना अनुष्का भरणे यांनी इंदापूर तालुक्याचे आमदार आणि तत्कालीन राज्यमंत्री दत्तात्रय भरणे यांच्या माध्यमातून तक्रारवाडी गावाला ३ कोटी ६० लाख रुपयाचा विकास निधी देण्यात आला असल्याचे सांगितले. तर गेल्या १५ वर्षात इंदापूर तालुक्यातील सर्वसामान्य नागरिकांच्या अडचणी सोडवीत कोट्यावधी रुपयाचा विकास निधी तालूक्यासाठी आणला आहे. त्यामुळे इंदापूरकरांनी त्यांना तीनवेळा निवडून आणण्याची पोच पावती दिली असल्याचे सांगितले.
यावेळी तक्रारवाडी गावच्या सरपंच मनीषा वाघ ,राष्ट्रवादी अजित पवार गटाच्या सीमा काळंगे, माजी उपसरपंच प्रशांत वाघ, विलास गडकर, मुख्याध्यापक राजेश नाचन, शिक्षण समिती अध्यक्ष महेश वाघ यांनी मनोगते व्यक्त केली. यावेळी भिगवण मदनवाडी तसेच भिगवण स्टेशन येथील राजकीय सामाजिक कार्यकर्ते यांनी हजेरी लावली.
तक्रारवाडी जिल्हा परिषद शाळेला मंत्री भरणे यांच्या माध्यमातून निधी मिळाला असताना देखील स्थानिक कार्यकर्त्यांनी मात्र या कार्यक्रमाकडे पाठ फिरविली असल्याचे चित्र दिसून आले. तर ग्रामपंचायत सरपंच, उपसरपंच आणि इतर दोन तीन सदस्य सोडता काही सदस्याची अनुपस्थिती दिसून आली. ग्रामस्थ आणि महिला तसेच पालकांची उपस्थिती मोठ्या प्रमाणावर दिसून आली.
