पुणे: बळजबरीने जमिनीचा ताबा घेऊन तब्बल 5 कोटी 40 लाख रुपयांची खंडणी उकळल्याप्रकरणी कुप्रसिद्ध आंदेकर (Andekar Gang) टोळीविरुद्ध मोठी कारवाई (Pune Crime) करण्यात आली आहे. या प्रकरणी टोळीचा म्होरक्या बंडु आंदेकर (Bandu Andekar) आणि त्याचा साथीदार मनोज वर्देकर यांच्या विरोधात समर्थ पोलीस ठाण्यात गुन्हा दाखल करण्यात आला आहे. फिर्यादीकडून जमिनीच्या नियोजित विकासासाठी आणखी 1 कोटी 80 लाख रुपयांची खंडणी मागितल्याचा आरोपही करण्यात आला आहे.
फिर्यादीच्या तक्रारीनुसार, बंडु आंदेकर आणि वर्देकर यांनी त्यांच्या मालकीच्या जमिनीवर बेकायदा कब्जा केला. या कब्ज्यातून त्यांनी भाड्याच्या नावाखाली 5 कोटी 40 लाख रुपये उकळले. एवढ्यावरच थांबता न येता, जमिनीच्या नियोजित विकसनासाठी 1 कोटी 80 लाख रुपयांची अतिरिक्त मागणी करण्यात आली. या सर्व प्रकाराने त्रस्त होऊन फिर्यादीने थेट पोलिसांकडे धाव घेतली.
आंदेकर टोळीचा धमकावण्याचा इतिहास नवीन नाही. अनेक वर्षांपासून गणेश पेठेतील मासळी बाजारात विक्रेत्यांकडून जबरदस्तीने हप्ते उकळल्याच्या तक्रारी सातत्याने समोर येत होत्या. पोलिसांनी यापूर्वीच व्यापाऱ्यांना धैर्य दाखवून अशा टोळीविरुद्ध तक्रार करण्याचे आवाहन केले होते. अखेर तक्रार दाखल होताच पोलिसांनी तातडीने कारवाई करत आंदेकरच्या घरावर छापा टाकला. या छाप्यात जमीन व्यवहारासंदर्भातील महत्त्वाची कागदपत्रे पोलिसांनी जप्त केली आहेत.
तपासादरम्यान पोलिसांना या टोळीने धमकावून अनेकांकडून खंडणी उकळल्याचा संशय आला आहे. आरोपींनी जमीन बळकावून त्यातून भाड्याचे पैसे वसूल केले आणि जमिनीच्या विकासासाठी स्वतंत्रपणे खंडणी मागितल्याचे फिर्यादीने स्पष्ट केले आहे. या प्रकरणात पोलिसांनी खंडणीवसुली आणि बेकायदा जमिनीचा ताबा घेण्याच्या कलमांखाली गुन्हा नोंदवला आहे.
सध्या बंडु आंदेकर आणि मनोज वर्देकर या दोघांवर गुन्हा दाखल झाला असून, इतर आरोपींचा शोध सुरू आहे. पोलिसांनी तपासाचा वेग वाढवला असून, टोळीने आणखी कोणाकडून खंडणी उकळली आहे का, याचा शोध घेतला जात आहे. या कारवाईमुळे स्थानिक व्यापाऱ्यांमध्ये दिलासा निर्माण झाला आहे. तसेच या प्रकारांवर नियंत्रण ठेवण्यासाठी पोलिसांनी विशेष पथके तैनात केली आहेत.
या प्रकरणामुळे पुन्हा एकदा आंदेकर टोळीचे गुन्हेगारी जाळे उघडकीस आले आहे. पोलिसांकडून पुढील तपास सुरू असून, लवकरच आणखी धक्कादायक माहिती समोर येण्याची शक्यता व्यक्त केली जात आहे.
