बारामती : आगामी लोकसभा निवडणुकीच्या पार्श्वभूमीवर बारामती लोकसभा मतदारसंघात नणंद विरुद्ध भावजयीच्या उमेदवारीची चर्चा रंगली आहे. उपमुख्यमंत्री अजित पवार यांच्याकडून मतदारांना वळवण्याचे काम सुरु असतानाच आता शरद पवार अॅक्टिव्ह मोडवर आल्याचे चित्र दिसत आहे. शरद पवार यांनी बारामती लोकसभा मतदारसंघात येणाऱ्या ६ विधानसभा मतदार संघातील पदाधिकाऱ्यांसोबत बैठकांचा धडाका लावला आहे.
बारामती लोकसभा मतदारसंघात दौंड, इंदापूर, बारामती, पुरंदर, भोर, खडकवासला हे सहा विधानसभा मतदारसंघ येतात. त्यात बारामती राष्ट्रवादीकडून अजित पवार, इंदापूरमध्ये राष्ट्रवादीकडून दत्तात्रय भरणे, दौंडमधून भाजपचे राहुल कूल, पुरंदर मधून कॉंग्रेसचे संजय जगताप आणि भोर-वेल्हामधून कॉंग्रेसचे संग्राम थोपटे आणि खडकवासल्यातून भीमराव तापकीर निवडून आलेले आहेत. यातील दोन कॉंग्रेसचे आमदार महाविकास आघाडीकडे आहेत. त्यामुळे ते दोन आमदार सुप्रिया सुळेंच्या बाजूने असतील. मात्र इतर ठिकाणी सुप्रिया सुळे आणि शरद पवारांना निवडणुकीसाठी नवी यंत्रणा उभारावी लागणार आहे.
दरम्यान, या लढाईत अजित पवारांनी देखील कंबर कसली आहे. अनेक कार्यकर्त्यांना आपल्याकडे वळवून घेण्यासाठी अजित पवारांचा प्रयत्न आहे. अजित पवारांनी गावपातळीवर सभा घ्यायला सुरुवात केली आहे. खडकवासला, इंदापूर असे काही मतदारसंघ अजित पवार पिंजून काढत आहेत. अजित पवारांचे हे मेळावे पाहून आता शरद पवार देखील कामाला लागले आहेत. पुण्यात देखील पदाधिकाऱ्यांच्या बैठका होत आहेत. या बैठकांमध्ये पक्षाची आणि लोकसभा निवडणुकींची रणनिती ठरवण्यात येणार आहे.
सुप्रिया सुळे आणि शरद पवार यांच्याकडून बैठक घेण्यात येणार आहे. त्यासोबतच पदाधिकाऱ्यांना मार्गदर्शनदेखील करण्यात येणार आहे. या लोकसभेच्या निवडणुकीसाठी शरद पवारांना आता नवी फळी तयार करुन कामाला लावावी लागणार आहे. बारामतीत यंदा नणंद भावजय आमने-सामने उभ्या ठाकणार असल्याने या बारामती लोकसभा मतदारसंघाकडे राज्याच्या वर्तुळाचं लक्ष लागलं आहे.
