पुणे : कुर्डू गावातील अवैध उत्खननाच्या प्रकरणावरून व्हायरल झालेल्या व्हिडिओबाबत उपमुख्यमंत्री अजित पवार (Ajit Pawar On Anjana Krishna) यांनी आपली भूमिका स्पष्ट केली आहे. “कुर्डूतील घटनेबाबत मी ट्विट करून माझी भूमिका मांडली आहे. मुख्यमंत्री देवेंद्र फडणवीस यांनी याची दखल घेतली आहे,” अशा शब्दांत अजित पवार यांनी आपली प्रतिक्रिया दिली. पुण्यातील हडपसर येथे जनता दरबारानंतर माध्यमांशी बोलताना त्यांनी विविध मुद्द्यांवर मत व्यक्त केले.
सोलापूर जिल्ह्यातील माढा तालुक्यातील कुर्डू गावात रस्त्यासाठी मुरुम उत्खनन सुरू असल्याची तक्रार आल्यानंतर करमाळ्याच्या पोलिस उपअधिक्षक अंजना कृष्णा या घटनास्थळी दाखल झाल्या होत्या. यावेळी ग्रामस्थांशी त्यांचा वाद झाला. त्याच वेळी राष्ट्रवादी काँग्रेसचे कार्यकर्ते बाबा जगताप यांनी थेट उपमुख्यमंत्री अजित पवारांना फोन केला. त्यानंतर पवार आणि आयपीएस अधिकारी अंजना कृष्णा (IPS Anjana Krishna) यांच्यातील संवादाचा व्हिडिओ सोशल मीडियावर मोठ्या प्रमाणावर व्हायरल झाला. या प्रकरणावर विरोधी पक्षांसह सत्ताधाऱ्यांनीही तीव्र प्रतिक्रिया व्यक्त केल्या होत्या.
याबाबत अजित पवार म्हणाले, “कुर्डूतील घटनेबाबत मी ट्विट करून माझी भूमिका स्पष्ट केली आहे. मुख्यमंत्री देवेंद्र फडणवीस यांनी याची दखल घेतली आहे. माझं चांगलं काम दाखवण्याऐवजी नको ते मुद्दे पुढे केले जातात,” अशी नाराजीही त्यांनी व्यक्त केली.
दरम्यान, मुख्यमंत्री एकनाथ शिंदे नाराज असल्याच्या चर्चेबाबत विचारणा झाल्यावर अजित पवार म्हणाले, “एकनाथ शिंदे नाराज नाहीत, हे मी स्टॅम्प ड्युटीवर लिहून देऊ का? वेगळा अर्थ काढून राजकारण करू नका,” असे आवाहन त्यांनी माध्यमांना केले.
