Ajit pawar : महाराष्ट्राच्या राजकारणातील एक झंझावाती पर्व आज सकाळी ९ वाजता कायमचे शांत झाले. राज्याचे उपमुख्यमंत्री अजित पवार यांच्या विमानाला बारामती विमानतळाच्या धावपट्टीपासून अवघ्या एक किलोमीटर अंतरावर भीषण अपघात झाला. या दुर्घटनेत अजितदादांसह विमानातील पाचही जणांचा जागीच मृत्यू झाला. विमानाने घेतलेल्या पेटामुळे कोणालाही वाचवता आले नाही, या बातमीने अवघा महाराष्ट्र शोकसागरात बुडाला आहे. (Ajit pawar)
पवारांच्या डोळ्यांत पाणी, पण शब्दात संयम
ही बातमी समजताच राष्ट्रवादीचे सर्वेसर्वा शरद पवार दिल्लीहून तातडीने बारामतीला पोहोचले. ज्या रनवेवर दादांचे विमान उतरणार होते, तिथेच उभे राहून पवारांनी अपघाताची माहिती घेतली. डोळ्यांतील पाणी रोखत आणि कातरलेल्या आवाजात ते म्हणाले, “हा महाराष्ट्राच्या निर्णयक्षम नेतृत्वाचा अंत आहे. हे नुकसान कधीही भरून न निघणारे आहे.” विशेष म्हणजे, या घटनेवरून राजकारण करणाऱ्यांना त्यांनी ठणकावून सांगितले की, “हा निव्वळ अपघात आहे, यात राजकारण शोधू नका.”
का महत्त्वाचे आहे हे नेतृत्व?
अजित पवार म्हणजे केवळ एक मंत्री नव्हते, तर ते प्रशासनाचे चाक होते.
निर्णयक्षमता : फाईलवर तत्काळ सही आणि कामाचा धडाका ही त्यांची ओळख होती.
ग्रामीण महाराष्ट्राचा आधार : त्यांच्या निधनानंतर बारामतीपासून बीडपर्यंत ग्रामीण भागातील कार्यकर्ता धाय मोकलून रडत आहे, यातच त्यांच्या लोकप्रियतेचे गमक आहे.
राजकीय पोकळी : महायुती असो वा राष्ट्रवादी काँग्रेस, अजित पवारांच्या जाण्याने सत्तेचे आणि संघटनेचे समीकरण विस्कळीत झाले आहे.
मैदानावर काय घडलं?
विमान उतरत असताना धावपट्टी संपण्याच्या काही अंतर आधीच एका खोलगट भागात कोसळले आणि क्षणात मोठा स्फोट झाला. सुप्रिया सुळे आणि सुनेत्रा पवार यांचे अश्रू पाहून तिथे उपस्थित असलेल्या प्रत्येकाचा कंठ दाटून आला होता. सध्या बारामती आणि परिसरात कडकडीत बंद पाळण्यात आला असून, संपूर्ण राज्याचे लक्ष आता अंतिम संस्कारांच्या नियोजनाकडे लागले आहे.
