पुणे : पुण्यात मैत्रिणीबरोबर गप्पा मारत थांबलेल्या महिलेला टेम्पोने जोरदार धडक दिली. या अपघातात महिलेचा मृत्यू झाल्याची घटना घडली आहे. तसेच या अपघातात दाम्पत्य जखमी झाले आहेत. ही घटना शनिवारी रात्री आठच्या सुमारास पुणे-सातारा रस्त्यावरील कात्रज भागातील मांगडेवाडी परिसरात घडली आहे. दीपाली वैभव बर्गे असे मृत्युमुखी पडलेल्या महिलेचे नाव आहे.
याप्रकरणी टेम्पोचालकाविरुद्ध पोलिसांनी गुन्हा दाखल केला. या अपघातात पार्वती आदिनाथ वायदंडे (वय-५०, रा. साईराज बिल्डींग, मांगडेवाडी, कात्रज) आणि त्यांचे पती आदिनाथ जखमी झाले आहेत. पार्वती यांनी याबाबत भारती विद्यापीठ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, दीपाली आणि त्यांची मैत्रीण पार्वती, पती आदिनाथ शनिवारी रात्री आठच्या सुमारास कात्रज भागातील मांगडेवाडी परिसरात गप्पा मारत उभे होते. त्यावेळी कात्रज घाटातून पुण्याकडे निघालेल्या भरधाव टेम्पोने रस्त्याच्या कडेला थांबलेल्या दीपाली यांना जोरदार धडक दिली. पार्वती आणि त्यांचे पती आदिनाथ यांना धडक देऊन टेम्पोचालक घटनास्थळी न थांबता पसार झाला.
या अपघातानंतर नागरिकांनी दीपाली, पार्वती आणि त्यांचे पती आदिनाथ यांना रुग्णालयात दाखल करण्यात आले. मात्र, उपचारादरम्यान दीपाली यांचा रुग्णालयात मृत्यू झाला. या अपघाताची माहिती मिळताच वरिष्ठ पोलीस निरीक्षक शरद झिने यांनी घटनास्थळी भेट दिली. अपघातानंतर पसार झालेल्या टेम्पाेचालकाच शोध घेण्यात येत असून पोलीस उपनिरीक्षक शिंदे तपास करत आहेत.
