लोणी काळभोर (पुणे)– हवेली तालुक्यात ११ गुंठ्यांची खरेदी-विक्री दस्त नोंदणी सुरु करावी या मागणीसाठी येत्या गुरुवार (ता. 25) पासुन पुण्यात विधानभवनासमोर हवेली तालुका भारतीय जनता पक्षाच्या वतीने भारतीय जनता पक्षाचे बेमुदत आमरण उपोषण सुरु करण्यात येणार असल्याची घोषणा तालुकाध्यक्ष संदीप भोंडवे यांनी केली आहे.
हवेली तालुक्यात ११ गुंठ्यांची खरेदी-विक्री दस्त नोंदणी सुरु करण्याबरोबरच, हवेलीसह संपुर्ण राज्यात मागील सहा महिण्याच्या कालावधीत बेकायदा झालेली दस्त नोंदणी रद्द करुन, बेकायदा दस्त नोंदणी करणाऱ्या अधिकाऱ्यांना तात्काळ निलंबीत करण्यात यावे अशीही मागणी तालुकाध्यक्ष संदिप भोंडवे यांनी केली आहे.
याबाबत बोलतांना संदीप भोंडवे म्हणाले, मुद्रांक व नोंदणी विभागाने तुकाडाबंदी व तुकडाजोड कायदा १९४७ नुसार राज्यातील ११ गुंठे जमीनीचा तुकडा पाडून विक्री करण्यास अथवा जमिनीची रजेस्ट्री करण्यावर प्रतिबंध घातला आहे. या आदेशावर औरंगाबाद खंडपीठाने मुद्रांक व नोंदणी विभागाचा परिपत्रक रद्द करण्याचा निर्णय दिला आहे. न्यायालयाच्या निर्णयानंतरही फक्त हवेली तालुका वगळून सर्वत्र ११ गुंठे क्षेत्राचे खरेदी खते सुरू आहेत. एकापेक्षा जास्त व्यक्तीच्या नावावर शेत जमिनीचे ११ गुंठ्याचे क्षेत्र नोंदणी करण्यास फक्त हवेली तालुक्यातच मनाई केली आहे.
पण औरंगाबाद खंडपीठाने दिलेल्या निर्णयानुसार संपूर्ण महाराष्ट्र मध्ये शेत जमिनीच्या ११ गुंठ्यांचे खरेदीदस्त नोंदणी सुरू करण्यात आलेली आहे. औरंगाबाद खंडपीठाने परिपत्रक रद्द करण्याचा निर्णय देऊन २०२२ पासून हवेली तालुक्यातील शेत जमिनीचे ११ गुंठ्याचे खरेदी दस्त नोंदणी अजूनही बंद आहेत ही बाब अतिशय चुकीची व हवेली तालुक्यावर अन्याय करणारी आहे.
भोंडवे पुढे म्हणाले, संपूर्ण राज्यात व पुणे जिल्ह्यात एकच कायदा असतांनाही, हवेली तालुक्यात मात्र ११ गुंठे जमीनींची खरेदी खते थांबविण्यात आली आहेत. हवेली तालुक्यातील भूमिपूत्रांवर अन्याय होत आहे. गुंठ्यात शेतजमीन विकून मालमत्ता विक्रीचे सर्व व्यवहार बंद असल्याने अल्पभूधारक शेतकऱ्यांचे मोठे आर्थिक नुकसान होत आहे. नाईलाजास्तव शेतकऱ्यांना ११ गुंठे पेक्षा अधिक जमीन क्षेत्र खरेदी व विक्री करणे भाग पडत आहे. त्यामुळे शेतकऱ्यांना भूमिहीन होण्याचा धोका अधिक बनला आहे. परंतु जिल्ह्यात इतर तालुक्यांत तुकडा बंदी हा कायदा लागू नसल्याने जिल्ह्यात व राज्यात ११ गुंठे जमीनीची खरेदी व नोंदणी सुरू आहे.
संदीप भोंडवे पुढे म्हणाले, संपूर्ण पुणे जिल्ह्यातील ८६७ गावे पीएमआरडी मध्ये समाविष्ट झालेली आहेत. हवेली तालुक्यातील ६० ते ७० गावे पीएमआरडीएत सामाविष्ठ आहे. मात्र हवेलीतच हा नियम लागू का केला आहे असा प्रश्न सर्वसामान्य नागरिकांना पडला आहे. वास्तविक पुणे शहरातील अथवा शहरात असलेल्या बांधकाम व्यवसायिकांशी हात मिळवणी करून त्यांच्या हितासाठी हवेली तालुक्यामधील ११ गुंठे क्षेत्रफळाची खरेदी दस्त नोंदणी बंद केलेली आहे. असं भासवून गुपचूप खरेदीदस्त नोंदवून मोठ्या प्रमाणामध्ये काळा पैसा जमा करण्याचे काम अधिकारी करत असल्याचा आरोपही भोंडवे यांनी केला आहे.
अन्यथा हवेली तालुक्यातील शेतकऱ्यांची मुले देशोधडीला लागतील..
याबाबत बोलतांना संदीप भोंडवे म्हणाले, हवेली तालुक्यातील शेतकऱ्यांच्या हजारो मुलांनी प्लॉटिंग हा चांगला व्यवसाय असल्याने, प्लॉटिंगमध्ये कोट्यावधी रुपये गुंतवलेले आहेत. मात्र शासनाने हवेली तालुक्यात ११ गुंठे जमीनींची खरेदी खते थांबविल्याने, तालुक्यातील तरुण देशोधडीला लागण्याच्या मार्गावरआहेत. शेतकऱ्यांची मुले व्यवसाय धंद्यात उतरत असतील तर, त्यांना शासनाने अशा पध्दतीने आडकाठी आणने चुकीचे आहे. येत्या गुरुवार पासुन बेमुदत उपोषन सुरु करीत आहेत. त्यानंतरही शासणाने दखल न घेतल्यास, पुढील आंदोलनअधिकच उग्र करण्यात येईल असेही भोंडवे यांनी यावेळी स्पष्ठ केले.
