पुणे : राष्ट्रवादी काँग्रेस पक्ष कोणाचा ? याबाबत आज (6 ऑक्टोबर) दुपारी तीन वाजता केंद्रीय निवडणूक आयोगात सुनावणी पार पडणार आहे. या सुनावणीकडं संपूर्ण राज्याचं लक्ष लागलं आहे. त्यातच शरद पवार गटाचे नेते आणि प्रदेशाध्यक्ष जयंत पाटील यांनी पक्ष आमचाच आहे आणि जास्तीत जास्त लोक पवार साहेबांसोबत आहे, असा दावा केला आहे. याशिवाय पक्षाचे बहुसंख्य कार्यकर्ते आणि पदाधिकारीदेखील आमच्यासोबत आहेत. गुरुवारी दिल्लीत झालेल्या बैठकीत 24 राज्याचे प्रदेशाध्यक्ष आमच्यासोबत होते, असं त्यांनी म्हटलं आहे.
शिवसेनेच्या फुटीनंतर सर्वोच्च न्यायालयात जेव्हा हा प्रश्न मांडला गेला, त्यावेळी आमदार गेले म्हणजे पक्ष जातो असं नाही. तर पक्ष हा कायम पक्ष राहतो, असं सरन्यायाधीश चंद्रचुड यांनी म्हटलं होतं. राष्ट्रवादीचे आमदार पक्षापासून लांब गेले किंवा त्यांनी वेगळी भूमिका घेतली तर हा त्यांचा प्रश्न आहे. त्यामुळे राष्ट्रवादी पक्ष जाण्याची आवश्यकता नाही, असं म्हणत जयंत पाटील यांनी पक्ष आपलाच असल्याचा दावा केला आहे.
या सर्व प्रकरणाबाबत केंद्रीय निवडणूक आयोग चुकीचा निर्णय देणार नाही. मात्र, जर निवडणूक आयोगाने चुकीचा निर्णय दिला तर आम्ही कोर्टात जाऊ, असं देखील त्यांनी स्पष्ट केलं आहे. राष्ट्रवादीचे दोन्ही गट भविष्यात एकत्र येतील असं मला वाटत नाही. आता ते पक्षापासून वेगळे झाले. पुन्हा एकत्र येण्याची शक्यता कमी आहे, असं देखील जयंत पाटील यांनी सांगितले.
सध्या महाराष्ट्रात पक्ष चोरीचा प्रकार सुरु आहे. सुरुवातीला शिवसेना पक्ष चोरी गेला आणि आता राष्ट्रवादी जायच्या तयारीत आहे. देशात राजकीय पक्षाची चोरी होत आहेत, एकाची झाली. मात्र, यापुढे पक्षाची चोरी होऊ नये, असं विठ्ठलाला जयंत पाटील यांनी साकडं घातलं आहे.
‘आम्ही भाजपाबरोबर जाण्याचा निर्णय घेतला नाही’
प्रदेशाध्यक्ष जयंत पाटील आणि जितेंद्र आव्हाड यांनी जून 22 मध्ये भाजपमध्ये जाण्याचा निर्णय घेतला होता, असा दावा खासदार प्रफुल्ल पटेल यांनी केला आहे. त्यासंदर्भात राष्ट्रवादीचे अध्यक्ष शरद पवारांना पत्रही दिलं होतं. यावर बोलताना जयंत पाटील म्हणाले की, “भाजपाबरोबर जाण्याचा निर्णय मी किंवा जितेंद्र आव्हाडांनी घेतला नाही. एवढचं काय माझ्याबरोबरच्या कोणत्याही नेत्याने हा निर्णय कधीच घेतला नाही”
