तिरूवनंतपुरम : केरळच्या थंपानूर परिसरातून एक धक्कादायक घटना समोर आली आहे. 26 वर्षीय सॉफ्टवेअर इंजिनिअर आनंदू अजी या तरुणानं लॉजमध्ये आत्महत्या केली. आनंदू हा कोट्टायम जिल्ह्यातील थंपलाकड भागातील रहिवासी होता. गेल्या काही दिवसांपासून तो तीव्र मानसिक तणावाखाली असल्याची माहिती मिळाली आहे. त्यानं आत्महत्येपूर्वी सोशल मीडियावर केलेल्या पोस्टमध्ये राष्ट्रीय स्वयंसेवक संघाच्या (RSS) सदस्यांकडून झालेल्या लैंगिक छळामुळे आयुष्य संपवण्याचा निर्णय घेतल्याचं नमूद केलं आहे.
ही घटना गुरुवारी उघडकीस आली. आनंदू थंपानूरमधील एका लॉजमध्ये राहत होता. बराच वेळ तो बाहेर न आल्याने कर्मचाऱ्यांनी दरवाजा ठोठावला. प्रतिसाद न मिळाल्याने त्यांनी लॉज मालकाला माहिती दिली. पोलिसांनी दरवाजा तोडून आत प्रवेश केला असता, आनंदू लटकलेल्या अवस्थेत आढळला.
आत्महत्येपूर्वी आनंदूने एक इन्स्टाग्राम पोस्ट शेड्यूल केली होती, जी त्याच्या मृत्यूनंतर स्वयंचलितपणे प्रसिद्ध झाली. त्या पोस्टमध्ये त्यानं लिहिलं “मी दीर्घकाळ डिप्रेशनशी झुंज दिली. आता जीवन संपवण्याचा निर्णय घेतो आहे. माझ्या मृत्यूला कोणतीही मुलगी, प्रेमकहाणी किंवा कर्ज कारणीभूत नाही. माझ्या बालपणी झालेल्या लैंगिक छळामुळे निर्माण झालेल्या मानसिक आजारामुळे मी हे पाऊल उचलतोय.”
आनंदूने आपल्या 15 पानी पत्रात बालपणी RSS शिबिरांमध्ये झालेल्या शारीरिक आणि लैंगिक छळाचे तपशील दिले आहेत. “मी बालपणी RSS संघात सामील झालो. तिथल्या सदस्यांनी माझ्यावर वारंवार शारीरिक आणि लैंगिक छळ केला. मला त्या व्यक्तीचं नाव आठवत नाही, पण त्यांनी शिबिरांमध्ये माझ्यावर अमानुष वागणूक दिली,” असं आनंदूने लिहिलं. त्यानं पुढे सांगितलं की, “RSS सदस्यांपासून सावध राहा. ते नातेवाईक, वडील, भाऊ किंवा मित्र असले तरी, अशा लोकांना आपल्या जीवनातून दूर ठेवा. हे लोक अत्यंत विषारी आहेत.”
त्याने आपल्या पत्रात पुढे नमूद केलं की, “RSS शिबिरांमध्ये माझ्यासारख्या अनेक मुलांना शारीरिक आणि लैंगिक छळ सहन करावा लागला. मी आता संघातून बाहेर पडलोय, म्हणून हे सगळं उघडपणे सांगत आहे.”
या प्रकरणावर DYFI केरळ स्टेट कमिटीचे उपाध्यक्ष व्ही. के. सनोज यांनी प्रतिक्रिया देताना म्हटलं, “आनंदूच्या मृत्यूने RSSचं अमानवी रूप समोर आलं आहे. त्याच्या शेवटच्या शब्दांमधून या संस्थेची विचारसरणी किती धोकादायक आहे, हे स्पष्ट होतं. समाजाने अशी विषारी मानसिकता पूर्णपणे नाकारली पाहिजे.” सध्या पोलिसांकडून आनंदूच्या आत्महत्येचा आणि त्यानं केलेल्या आरोपांचा तपास सुरू असून, त्याच्या पत्रातील माहितीची पडताळणी केली जात आहे.
