उत्तर प्रदेश: उत्तर प्रदेशमध्ये एका 14 वर्षीय अल्पवयीन मुलीवर सामूहिक बलात्कार झाल्याची धक्कादायक घटना उघडकीस आली आहे. पीडित मुलीच्या मैत्रिणीच्या वडिलांनी आणि त्यांच्या दोन मित्रांनी मिळून हे भयंकर कृत्य केले. या घटनेतील मुख्य आरोपी, मैत्रिणीचे वडील आणि ती मैत्रीण अद्याप फरार असून पोलीस त्यांचा शोध घेत आहेत. (latest crime news)
बेशुद्धावस्थेत सापडल्यावर उघड झाले क्रूर कृत्य
पीडित मुलीचे वडील किडनीच्या आजाराने त्रस्त असल्याने तिची आई एकटीच काम करून कुटुंबाचा सांभाळ करते. 13 नोव्हेंबर रोजी त्यांची 14 वर्षांची मुलगी अचानक घरातून गायब झाली. अनेक ठिकाणी शोध घेऊनही ती न सापडल्याने आईने पोलीस ठाण्यात बेपत्ता झाल्याची तक्रार दिली होती.
जवळपास 12 दिवसांनंतर, 25 नोव्हेंबर रोजी पीडित मुलगी गांधी बाजार येथील रहिवासी असलेल्या नरेश नावाच्या आरोपीच्या घरी बेशुद्धावस्थेत आढळून आली. शुद्धीवर आल्यावर तिने आईला घडलेला सर्व प्रकार सांगितला, ज्यामुळे कुटुंबाला मोठा धक्का बसला.
मैत्रिणीनेच रचला कट
पीडितेने पोलिसांना सांगितले की, तिच्या मैत्रिणीने तिला तिच्या घरी बोलावले. तिथे मैत्रिणीने कोल्ड ड्रिंक दिले. ते प्यायल्यानंतर ती बेशुद्ध झाली. त्यानंतर मैत्रिणीचे वडील आशिष यांनी त्यांचे मित्र नरेश आणि हेमंत यांना बोलावून घेतले. या तिघांनी आळीपाळीने तिच्यावर सामूहिक बलात्कार केला.
पोलिसांच्या कार्यवाहीत विलंब
या घटनेनंतर पीडितेने तात्काळ पोलीस ठाण्यात धाव घेऊन तक्रार देण्याचा प्रयत्न केला, मात्र सुरुवातीला पोलिसांनी कारवाई केली नाही. वारंवार तक्रार करूनही गुन्हा दाखल होत नसल्याने पीडितेने थेट पोलीस अधीक्षक कुंवर ज्ञानेंद्र सिंह यांची भेट घेऊन त्यांना संपूर्ण घटनेची माहिती दिली.
अधीक्षकांच्या आदेशानंतर पोलिसांनी घटनेचे गांभीर्य लक्षात घेऊन आरोपींविरुद्ध विविध कलमांखाली गुन्हा दाखल करण्यात आला आहे.
दोन आरोपींना बेड्या
पोलिसांनी तातडीने सूत्रे हलवत या प्रकरणी हेमंत आणि नरेश या दोन आरोपींना अटक केली आहे. मात्र, या प्रकरणातील मुख्य आरोपी, म्हणजेच पीडितेची मैत्रीण आणि तिचे वडील आशिष हे सध्या फरार आहेत. फरार आरोपींचा शोध घेण्यासाठी पोलिसांनी पथके तयार केली असून, त्यांना लवकरच अटक केली जाईल, असे पोलिसांनी सांगितले.
