नवी दिल्ली : श्रद्धा वालकर हत्या प्रकरणातील आरोपी आफताब अमीन पुनावाला याने दिल्लीतील तिहार तुरुंगात आपल्या जीवाला धोका असल्याचा दावा केला आहे. गेल्या काही दिवसांपासून अन्य कैद्यांकडून जीवे मारण्याच्या धमक्या मिळत असून, तुरुंगातील सुरक्षा वाढवण्याची मागणी त्याने केली आहे. या दाव्यामुळे श्रद्धा वालकर हत्या प्रकरण पुन्हा चर्चेत आले आहे.
आफताबच्या आरोपानुसार, गेल्या १० दिवसांपासून काही कैदी त्याला सातत्याने धमकावत आहेत. तसेच शस्त्रांच्या साहाय्याने चेहऱ्यावर हल्ला करण्याचा प्रयत्न केल्याचा दावाही त्याने केला आहे. धमक्या देणाऱ्या पाच कैद्यांची नावेही आफताबने सांगितल्याची माहिती समोर आली आहे. या पार्श्वभूमीवर तुरुंगातील सुरक्षेबाबत त्याने चिंता व्यक्त केली आहे.
२०२२ मध्ये श्रद्धा वालकर हिच्या हत्येच्या घटनेने संपूर्ण देश हादरला होता. श्रद्धाची हत्या करून तिच्या मृतदेहाचे ३५ तुकडे केल्याचा गंभीर आरोप तिचा प्रियकर आफताब अमीन पुनावाला याच्यावर आहे. या प्रकरणाचा तपास आणि न्यायालयीन प्रक्रिया सुरू असताना, आता तुरुंगातील सुरक्षेबाबत आफताबने केलेल्या दाव्यांमुळे हे प्रकरण पुन्हा चर्चेत आले आहे.
