LPG Cylinder Price: देशात नवीन वर्षाचे स्वागत होत असतानाच 1 जानेवारी 2026 रोजी तेल कंपन्यांनी व्यावसायिक वापराच्या एलपीजी गॅस सिलिंडरच्या किमतीत थेट 111 रुपयांची वाढ केली आहे. ही दरवाढ आजपासून लागू करण्यात आली असून याचा मोठा फटका हॉटेल आणि रेस्टॉरंट चालकांना बसणार आहे. व्यावसायिक सिलिंडर महागल्यामुळे बाहेरचे जेवण देखील महाग होण्याची शक्यता वर्तवण्यात येत आहे. दर महिन्याच्या पहिल्या दिवशी सरकारी पेट्रोलियम कंपन्या दरांचा आढावा घेतात आणि त्याप्रमाणे हे नवीन दर आज निश्चित करण्यात आले आहेत.
या दरवाढीमध्ये व्यावसायिक गॅस महागला असला तरी घरगुती वापराच्या सिलिंडरच्या किमतीत कोणताही बदल झालेला नाही. सामान्य कुटुंबांसाठी ही दिलासादायक बाब आहे, कारण त्यांच्या घराचे बजेट यामुळे बिघडणार नाही. यासोबतच विमान इंधन म्हणजेच एटीएफच्या दरात कपात करण्यात आली आहे, ज्यामुळे विमान प्रवास करणाऱ्यांना थोडा फायदा होऊ शकतो. तसेच सीएनजी आणि पीएनजीच्या किमतींमध्येही काही प्रमाणात घट करण्यात आली आहे.
डिसेंबर महिन्यात व्यावसायिक सिलिंडरचे दर केवळ 1 रुपयाने कमी झाले होते, मात्र आता नवीन वर्षाच्या सुरुवातीलाच मोठी दरवाढ झाल्याने व्यापाऱ्यांमध्ये चिंतेचे वातावरण आहे.
