दिल्ली : राज्यात विधानसभा निवडणुकीची रणधुमाळी सुरु असून प्रचाराला चांगलाच जोर आला आहे. राज्यात राजकीय वातावरण तापले असतानाच दिल्लीमध्ये सुप्रीम कोर्टात एक महत्त्वाची सुनावणी पार पडली आहे. त्यामध्ये अजित पवार यांच्या राष्ट्रवादीला सुप्रीम कोर्टाने महत्त्वाचे निर्देश दिले आहेत. स्वतंत्र पक्ष म्हणून निवडणूक लढा. इलेक्ट्रॉनिक परिपत्रक काढा. तुमचे उमेदवार, कार्यकर्त्यांना शरद पवारांचे फोटो, व्हिडीओ वापरु नका याच्या सूचना द्या, असे निर्देश सुप्रीम कोर्टाने अजित पवार यांच्या राष्ट्रवादी काँग्रेस पक्षाला दिले आहेत.
त्याशिवाय आम्ही दिलेल्या सूचनांचं तंतोतंत पालन करा. सगळ्या ठिकाणी हे प्रकरण न्यायप्रविष्ट आहे असा मजकूर लिहा, असेही कोर्टाने अजित पवार गटाला सांगितले. तसेच, कोर्टाकडून अजित पवार आणि शरद पवार गटाला निवडणुकीवर लक्ष केंद्रीत करण्याच्या सूचना देण्यात आल्या आहेत.
नेमकं प्रकरण काय?
शरद पवार यांचे फोटो अजित पवार गटाकडून वापरले जात असल्याची तक्रार शरद पवार गटाने कोर्टात करण्यात आली होती. आज त्या प्रकरणावर सुनावणी पार पडली. यावेळी बोलताना कोर्टानं महत्त्वाचं निरीक्षण नोंदवलं आहे. व्हिडीओ वगैरेचा कधी कधी प्रभाव पडतो. दरवेळी मतदारांना प्रभावित करेल असं नाही. आपल्या देशातील जनता खूप हुशार आहे, त्यांना कोणी फसवू शकत नाही, असेही कोर्टाने यावेळी म्हटलं आहे.
कोर्टाने दिलेले आदेश आम्ही पाळले आहेत, कोर्टाच्या सूचनेनुसार आम्ही सर्व वृत्तपत्रात जाहिरात दिल्या आहेत अशी माहिती अजित पवार यांच्या वकिलांनी कोर्टात सांगितली. तसेच एकूण ११ वर्तमान पत्रात आम्ही जाहिराती दिल्या आहेत. मराठी, हिंदी आणि इंग्रजी अशा तिन्ही भाषेत जाहिराती दिल्या असल्याचे अजित पवारांच्या वकिलांनी कोर्टात सांगितले आहे.
