बोस्टनमध्ये गिलेट स्टेडियमध्ये प्रसिद्ध बँड कोल्डप्लेच्या कॉन्सर्ट दरम्यानचा एक व्हिडिओ सध्या सोशल मीडियावर मोठ्या प्रमाणात व्हायरल होत आहे. कोल्डप्लेच्या कॉन्सर्टमध्ये लावण्यात आलेल्या कॅमेऱ्याने एका जोडप्याचा रोमँटिक क्षण टिपला. या जोडप्याला जेव्हा याची जाणीव झाली, तेव्हा त्यांनी तोंड लपवत लगेच तिथून पळ काढला. हा व्हिडिओ सध्या नेटकऱ्यांमध्ये चर्चेचा विषय ठरला आहे.
हा व्हिडिओ एस्ट्रोनॉमर कंपनीचे सीईओ अँडी बायरन आणि त्यांच्या कंपनीची एचआर प्रमुख क्रिस्टिन कॅबोट यांचा आहे. या शो मध्ये दोघे एकमेकांच्या मिठीत कॉन्सर्टचा आनंद घेत होते. मात्र, इथे असलेल्या कॅमेरांमध्ये तो क्षण टिपला गेला आणि मोठ्या स्क्रीनवर दाखवण्यात आला. या व्हिडिओमुळे दोघांमधले अफेअर सगळ्यांसमोर उघडकीस आले आणि सर्वत्र त्यांची चर्चा सुरु झाली.
दरम्यान, अँडी बायरन यांची एस्ट्रोनॉमर कंपनी डेटा आणि सॉफ्टवेअरवर काम करते. अँडी बायरन यांच्या वैयक्तिक जीवनाबद्दल बोलायचे झाले तर त्यांचं लग्न मेगन केरिगन बायरन यांच्याशी झालं आहे. त्यांना दोन मुलं असून ते न्यूयॉर्कमध्ये राहतात. व्हिडीओ व्हायरल झाल्यानंतर आता मात्र पती-पत्नीमध्ये घटस्पोटाच्या चर्चा रंगल्याचं सांगण्यात येत आहे.
