Bolivia Plane Crash : दक्षिण अमेरिकेतील बोलिव्हिया देशात एक मोठी दुर्घटना घडली आहे. राजधानी ला पाझजवळील एल अल्टो शहरात हवाई दलाचे विमान कोसळल्याची घटना शुक्रवारी घडली. या अपघातात 15 जणांचा मृत्यू झाला असून सुमारे 30 जण जखमी झाले आहेत. जखमींना तातडीने रुग्णालयात दाखल करण्यात आले आहे. Plane Crash
विमान कोसळल्याने मोठा अपघात
मिळालेल्या माहितीनुसार, एल अल्टो आंतरराष्ट्रीय विमानतळावरून उड्डाण घेतल्यानंतर काही मिनिटांतच हे हर्क्युलस विमान नियंत्रणाबाहेर गेले आणि दाट लोकवस्ती असलेल्या भागातील मुख्य रस्त्यावर कोसळले. विमान रस्त्यावर आदळल्यानंतर तेथील काही वाहनांचेही नुकसान झाले. अपघातानंतर परिसरात मोठी धावपळ उडाली.
स्थानिक प्रशासनाने दिलेल्या माहितीनुसार, विमानातील काही कर्मचारी तसेच रस्त्यावरून जाणारे नागरिक या घटनेत मृत्युमुखी पडले. काही जखमींची प्रकृती गंभीर असल्याचे सांगितले जात आहे. अपघातानंतर विमानाचे अवशेष रस्त्यावर पसरले होते. काही ठिकाणी चलनी नोटा विखुरल्याचेही सांगितले जात आहे. त्या गोळा करण्यासाठी लोकांची गर्दी झाल्याची माहिती स्थानिक माध्यमांनी दिली आहे. परिस्थिती नियंत्रणात आणण्यासाठी पोलिसांना हस्तक्षेप करावा लागला.
अपघाताचे नेमके कारण अद्याप स्पष्ट झालेले नाही. मात्र खराब हवामान किंवा तांत्रिक बिघाडामुळे ही दुर्घटना घडली असावी, असा प्राथमिक अंदाज व्यक्त केला जात आहे. या घटनेनंतर एल अल्टो आंतरराष्ट्रीय विमानतळ काही काळासाठी बंद ठेवण्यात आला आहे. तपास यंत्रणा संपूर्ण घटनेचा सखोल तपास करत आहेत.
