मुंबई : माता रमाबाई मार्ग पोलीस ठाण्याच्या हद्दीत एका शिक्षकाने १४ वर्षीय विद्यार्थिनीचा विनयभंग केल्याची धक्कादायक घटना समोर आली आहे. आरोपी शिक्षकाने विद्यार्थिनीला ब्लॅकमेल करण्याचा प्रयत्न केल्याचाही आरोप आहे. या प्रकरणी पीडित विद्यार्थिनीच्या तक्रारीवरून पोलिसांनी गुन्हा दाखल करून आरोपी शिक्षकाला अटक केली आहे.
मोहम्मद कैफ मोहम्मद अस्लम शेख (वय २५) असे अटक करण्यात आलेल्या आरोपी शिक्षकाचे नाव आहे. तो विद्यार्थ्यांना संगणक विषय शिकवत असल्याचे सांगण्यात आले आहे. पोलिसांच्या माहितीनुसार, आरोपीने सोशल मीडियाच्या माध्यमातून विद्यार्थिनीशी जवळीक साधण्याचा प्रयत्न केला.
आरोपी शिक्षकाने पीडित १४ वर्षीय विद्यार्थिनीशी संवाद वाढवण्यासाठी ‘स्नॅपचॅट’ या सोशल मीडिया अॅपचा वापर केल्याचे सांगण्यात आले आहे. चॅटिंगच्या माध्यमातून त्याने सुरुवातीला तिच्याशी जवळीक साधण्याचा प्रयत्न केला. त्यानंतर त्याने विद्यार्थिनीला स्नॅपचॅटवर अश्लील व्हिडिओ पाठवून तिचा विनयभंग केल्याचा आरोप आहे.
या प्रकाराबाबत कोणाला काही सांगितल्यास किंवा वाच्यता केल्यास तिचे शैक्षणिक करिअर पूर्णपणे खराब करण्याची धमकी आरोपी शिक्षकाने दिल्याचा आरोप आहे. या धमकीमुळे विद्यार्थिनी मानसिक दबावाखाली आल्याचे सांगण्यात आले आहे.
पालकांच्या तक्रारीनंतर पोलिसांची कारवाई
शिक्षकाच्या त्रासाला आणि धमक्यांना कंटाळून अखेर विद्यार्थिनीने घडलेला प्रकार आपल्या पालकांना सांगितला. त्यानंतर पालकांनी माता रमाबाई मार्ग पोलीस ठाण्यात जाऊन आरोपी शिक्षकाविरोधात तक्रार दाखल केली.
या तक्रारीवरून पोलिसांनी विविध कलमांसह पॉक्सो कायद्यांतर्गत गुन्हा दाखल केला. त्यानंतर आरोपी शिक्षक मोहम्मद कैफ मोहम्मद अस्लम शेख याला अटक करण्यात आली. या प्रकरणी पोलीस अधिक पुरावे गोळा करत असून पुढील तपास सुरू आहे.
