मुंबई: अमेरिकेतील कुख्यात लैंगिक गुन्हेगार जेफ्री एपस्टीन प्रकरणाशी संबंधित गुप्त कागदपत्रे आणि पुरावे सार्वजनिक झाल्यामुळे जागतिक राजकारणासह आता भारतातही वादाचे मोहोळ उठले आहे. महाराष्ट्राचे माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांनी या संदर्भात धक्कादायक दावे केले असून, या प्रकरणाचे धागेदोरे भारतीय नेत्यांपर्यंत पोहोचत असल्याचा आरोप केला आहे.
मोदी आणि केंद्रीय मंत्र्यांवर गंभीर आरोप
मुंबईत प्रसारमाध्यमांशी संवाद साधताना पृथ्वीराज चव्हाण म्हणाले की, जेफ्री एपस्टीन हा केवळ एक उद्योगपती नसून तो इस्रायलचा गुप्तहेर असल्याचे समोर येत आहे. चव्हाण यांनी दावा केला की, 2014 मध्ये पंतप्रधान नरेंद्र मोदी आणि एपस्टीन यांचा संपर्क आला होता. तत्कालीन अमेरिकन राष्ट्राध्यक्ष डोनाल्ड ट्रम्प यांच्या एका सल्लागाराला मोदींची भेट हवी होती आणि त्यासाठी एपस्टीनची मध्यस्थी वापरण्यात आली होती. त्या सल्लागाराशी मोदींचा काय संबंध होता? असा सवाल चव्हाण यांनी उपस्थित केला आहे.
याहूनही गंभीर बाब म्हणजे, अमेरिकेच्या न्याय विभागाने प्रसिद्ध केलेल्या ईमेलमध्ये भारताचे विद्यमान केंद्रीय पेट्रोलियम मंत्री हरदीप सिंग पुरी यांचा उल्लेख असल्याचा दावाही चव्हाणांनी केला आहे. हरदीप सिंग पुरी हे त्यावेळी अमेरिकेतील राजदूत होते. या संदर्भात मोदी सरकार आणि संबंधित सल्लागाराचे नेमके काय संबंध होते, असा सवाल त्यांनी उपस्थित केला आहे.
30 वर्षांचा डेटा आणि 3 लाख कागदपत्रे
एपस्टीन प्रकरणाचा इतिहास सांगताना चव्हाण म्हणाले की, 1995-96 पासून हे काळे साम्राज्य सुरू होते. ऑगस्ट 2019 मध्ये न्यूयॉर्कच्या उच्च सुरक्षा तुरुंगात एपस्टीनचा संशयास्पद मृत्यू झाला. त्यानंतर अमेरिकेतील जनतेच्या दबावामुळे ट्रम्प प्रशासनाला नाइलाजाने ही कागदपत्रे प्रसिद्ध करावी लागली.
या दिग्गजांचा समावेश
अमेरिकेच्या न्याय विभागाने तब्बल 3 लाख कागदपत्रे आणि 2.5 जीबीपेक्षा जास्त डेटा सार्वजनिक केला आहे. यामध्ये सुमारे 3500 फाईल्स असून त्यात ईमेल्स, पत्रे, ऑडिओ-व्हिडिओ रेकॉर्डिंग आणि फोटोंचा समावेश आहे. यात माजी राष्ट्राध्यक्ष बिल क्लिंटन, पॉप स्टार मायकल जॅक्सन, प्रिन्स अँड्र्यू आणि हॉलिवूड अभिनेता ख्रिस टकर यांच्यासारख्या दिग्गजांचा समावेश आहे. काही फोटोंमध्ये बिल क्लिंटन पार्टी करताना आणि स्विमिंग पूलमध्ये महिलांसोबत दिसत आहेत.
एपस्टीन हा अल्पवयीन मुलींना आमिष दाखवून त्यांने उच्च पदावरील बड्या नेत्यांना त्यांचा देह विक्रय केला. यामुळे त्याच्यावर अनेक बालिकांनी फौजदारी गुन्हे दाखल केले होते. एपस्टीनचा मृत्यू न्यूयॉर्कमधील अत्यंत कडक सुरक्षा असलेल्या तुरुंगात ऑगस्ट 2019 मध्ये झाला होता. तेंव्हा त्याने गळफास लावून आत्महत्या केली की या मोठ्या नेत्यांनी आणि उद्योजकांनी त्याचा खून केला? याचं स्पष्टीकरण अजूनही समोर आलेलं नाही.
एफबीआयने एपस्टीनच्या मॅनहॅटन येथील घराची झडती घेतली असता मिळालेले फोटो, तुटलेले दरवाजे आणि त्याच्या ‘लिटल सेंट जेम्स’ या खाजगी बेटावरील पार्ट्यांचे पुरावे या संचामध्ये आहेत. तथापि, काही संवेदनशील माहिती काही कारणास्तव अद्यापही राखून ठेवण्यात आली आहे.
माजी मुख्यमंत्री पृथ्वीराज चव्हाणांच्या या दाव्यामुळे राजकीय वर्तुळात मोठी खळबळ उडाली आहे. एपस्टीनसारख्या गुन्हेगाराच्या संपर्कात भारतीय यंत्रणा किंवा नेते कसे आले, असा प्रश्न आता उपस्थित केला जात आहे. अमेरिकेतील हा ‘डेटा बॉम्ब’ येणाऱ्या काळात भारतीय राजकारणावर नेमका काय परिणाम करणार, याकडे सर्वांचे लक्ष लागले आहे.
