मुंबई: नाशिकमधील भोंदूबाबा प्रकरणामुळे राज्यातील (Narhari Zirwal Viral Video) राजकारण आधीच ढवळून निघाले असताना, आता मंत्री नरहरी झिरवळ यांच्या कथित व्हिडिओमुळे नव्या वादाला तोंड फुटले आहे. मात्र या (Devendra Fdanavis) प्रकरणात राष्ट्रवादी काँग्रेसने झिरवळ यांना तातडीने दिलासा दिल्याचे स्पष्ट झाले आहे. (Maharashtra Politics)
याआधी भोंदू बाबा अशोक खरात प्रकरणावरून महिला आयोगाच्या अध्यक्षा रुपाली चाकणकर यांना पदाचा राजीनामा द्यावा लागला होता. या पार्श्वभूमीवर झिरवळ यांच्या कथित व्हिडिओनंतर त्यांच्यावरही कारवाई होणार का, याकडे सर्वांचे लक्ष लागले होते. विशेष म्हणजे, या व्हिडिओमध्ये ते शासकीय निवासस्थानी असल्याचा दावा करण्यात येत असल्याने प्रकरण अधिक संवेदनशील ठरले.
मात्र, राष्ट्रवादी काँग्रेसच्या वरिष्ठ पातळीवर झालेल्या चर्चेनंतर झिरवळ यांचा राजीनामा घेतला जाणार नसल्याची भूमिका स्पष्ट करण्यात आली आहे. “प्रत्येक आरोपावर तातडीने राजीनामा घेणे योग्य नाही,” असे पक्षातील सूत्रांनी सांगितले. यापूर्वी धनंजय मुंडे आणि माणिकराव कोकाटे यांच्यावर कारवाई करण्यात आली होती, त्यामुळे या वेळी वेगळी भूमिका घेतल्याने राजकीय चर्चा अधिकच रंगली आहे.
दरम्यान, मुख्यमंत्री देवेंद्र फडणवीस यांनीही सावध भूमिका घेतली आहे. झिरवळ यांनी स्वतः त्यांच्याशी संपर्क साधून काही व्हिडिओ चुकीच्या पद्धतीने जोडून व्हायरल केल्याचे सांगितले असल्याचे फडणवीस यांनी स्पष्ट केले. त्यांनी झिरवळ यांना अधिकृत तक्रार करण्याचा सल्ला दिला असून, “व्हिडिओची सत्यता तपासल्यानंतरच पुढील निर्णय घेतला जाईल,” असे त्यांनी नमूद केले.
या संपूर्ण प्रकरणात एकीकडे नैतिकतेचा प्रश्न उपस्थित होत असताना, दुसरीकडे ‘तपास पूर्ण होण्यापूर्वी कारवाई करावी का?’ यावरही चर्चा सुरू झाली आहे. सध्या तरी झिरवळ यांना पक्षाकडून संरक्षण मिळाले असले, तरी व्हिडिओची सत्यता आणि तपासाचा निष्कर्ष यावरच पुढील राजकीय दिशा ठरणार आहे.
