Mumbai : मुंबई: दक्षिण मुंबईतील खेतवाडी परिसरात मंगळवारी दुपारी एक अत्यंत दुःखद अपघात घडला. शाळेतून नातीला घरी घेऊन जाण्यासाठी आलेल्या एका महिलेला स्कूल बसने धडक दिली. या अपघातात महिलेच्या कुशीत असलेल्या 9 महिन्यांच्या बाळाचा बसच्या चाकाखाली चिरडून जागीच मृत्यू झाला. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, दुपारी सुमारे 12.23 वाजता कुलाबा येथील जे.बी. सोमाणी शाळेची बस विद्यार्थ्यांना उतरवत होती. त्या वेळी संबंधित महिला आपल्या नातीला बसमधून उतरवून घेत होती. तिच्या कुशीत लहान बाळ होते आणि नातीचा हात धरून ती रस्ता ओलांडत होती. त्याच क्षणी बस पुढे सरकली आणि महिलेला जोरदार धडक बसली.
धडकेनंतर महिला, बाळ आणि शाळकरी मुलगी रस्त्यावर कोसळल्याचे सीसीटीव्ही फुटेजमध्ये दिसते. बसचे पुढील चाक महिलेकडे व बाळाकडे गेल्याने बाळाचा जागीच मृत्यू झाला. महिला आणि मुलगी या दोघींनाही गंभीर दुखापत झाली असून त्यांना तातडीने रुग्णालयात दाखल करण्यात आले आहे.
अपघात होताच स्थानिक नागरिकांनी धाव घेत मदतकार्य केले. घटनेची माहिती मिळताच खेतवाडी पोलिसांनी घटनास्थळी पोहोचून पंचनामा केला. या प्रकरणी पोलिसांनी गुन्हा दाखल करून स्कूल बस चालकाला ताब्यात घेतले आहे. अपघाताचे नेमके कारण तपासले जात असून सीसीटीव्ही फुटेजच्या आधारे चौकशी सुरू आहे.
या अचानक घडलेल्या घटनेमुळे खेतवाडी परिसरात काही काळ गोंधळाचे वातावरण निर्माण झाले होते. शाळा बस चालकांनी आणि संबंधितांनी अधिक काळजी घ्यावी, तसेच विद्यार्थ्यांना उतरवताना सुरक्षिततेचे सर्व नियम पाळावेत, अशी मागणी स्थानिकांकडून करण्यात येत आहे. या दुर्दैवी घटनेचा व्हिडिओ सध्या सोशल मीडियावर व्हायरल होत असून नागरिकांकडून संताप व्यक्त केला जात आहे.
