Mumbai : टाटा समूहाचे माजी अध्यक्ष आणि दिवंगत उद्योगपती रतन टाटा यांचा सेशेल्समधला शानदार व्हिला आता विक्रीच्या उंबरठ्यावर आहे. माहे बेटावरील समुद्रकिनारी असलेली ही मालमत्ता सी. शिवशंकरन (एअरसेलचे संस्थापक) यांच्या कुटुंबाने तब्बल ६.२ मिलियन डॉलर म्हणजे साधारण ५५ कोटी रुपये देऊन घेण्याची इच्छा व्यक्त केली आहे. (Mumbai)
आश्चर्याची गोष्ट म्हणजे, या व्हिलाची स्वतंत्र मूल्यांकनात किंमत फक्त ८५ लाख रुपये ठरवली होती! पण या व्यवहारामागे टाटा-शिवशंकरन यांची जुनी मैत्रीदेखील मोठी कारणीभूत आहे. मजेची बाब म्हणजे, हा व्हिला रतन टाटा यांनी खरेदी केला तेव्हाही शिवशंकरन यांनीच त्यांना मदत केली होती.
दोघांची मैत्री तर सर्वपरिचित. मुंबईत टाटांच्या घरी ते दररोज ४५ मिनिटे भेटत असत. टाटांच्या जागतिक प्रतिमेमुळेच सेशेल्ससारख्या देशात, जिथे सामान्य लोकांना जमिन खरेदीची परवानगी मिळत नाही, तिथे त्यांना व्हिला घेता आला होता.
पैशाचे विभाजन कसे होणार?
व्हिला विकला गेला तर त्यातून मिळणारी रक्कम रतन टाटा एंडोमेंट फाउंडेशन आणि रतन टाटा एंडोमेंट ट्रस्ट या दोघांमध्ये समान वाटली जाणार आहे. हे बॉम्बे हाय कोर्टाने १६ जून २०२५ रोजी आदेशाने स्पष्ट केले आहे.
दरम्यान, शिवशंकरन यांच्यावर सेशेल्स सुप्रीम कोर्टात दिवाळखोरीची कारवाई सुरू आहे. त्यामुळे हा व्यवहार प्रत्यक्षात कसा पूर्ण होतो, याकडे सगळ्यांचे लक्ष लागले आहे.
