मुंबई : उद्या फ्लाइटने कुठेतरी जाण्याचा विचार करत असाल तर ही बातमी जरूर वाचा. छत्रपती शिवाजी महाराज आंतरराष्ट्रीय विमानतळाच्या दोन धावपट्टी १७ ऑक्टोबर रोजी सहा तासांसाठी बंद राहणार आहेत. या कालावधीत कोणतीही विमानसेवा सुरु राहणार नाही. मुंबई विमानतळावरील दोन्ही धावपट्ट्यांच्या देखभालीचे काम मंगळवार 17 ऑक्टोबर रोजी सकाळी 11 ते सायंकाळी 5 या वेळेत केले जाईल, असे विमानतळ प्रशासनाकडून यापूर्वी एका निवेदनात म्हटले आहे.
बंदचं कारण काय?
मुंबई छत्रपती शिवाजी महाराज आंतरराष्ट्रीय विमानतळावरील दोन्ही धावपट्टीवर देखभाल दुरुस्तीचे काम केले जाणार आहे. विमानतळ ऑपरेटरच्या निवेदनानुसार, “छत्रपती शिवाजी महाराज आंतरराष्ट्रीय विमानतळाच्या पावसाळ्यानंतरच्या सर्वसमावेशक धावपट्टी देखभाल योजनेचा एक भाग म्हणून, दोन्ही रनवे RWY 09/27 आणि RWY 14/32 हे 17 ऑक्टोबर रोजी सकाळी 11:00 वाजता ते 17:00 वाजेपर्यंत तात्पुरते बंद राहतील.” निवेदनात पुढे म्हटलं आहे की, “सीएसएमआयएने सर्व महत्त्वाच्या विभागांच्या सहकार्याने देखभालीचं काम सुरळीत पूर्ण करणे सुनिश्चित करण्यासाठी प्रभावीपणे उड्डाणे निर्धारित केली आहेत. सीएसएमआयएला प्रवाशांकडून सहकार्य आणि पाठिंबा अपेक्षित आहे.”
