मुंबई : राज्यातील महिलांच्या आर्थिक सक्षमीकरणासाठी राबवण्यात येणाऱ्या ‘मुख्यमंत्री-माझी लाडकी बहीण’ योजनेत (Ladki Bahin Yojana) लाभार्थ्यांना नियमित आर्थिक लाभ मिळावा आणि प्रक्रियेत पारदर्शकता यावी यासाठी e-KYC प्रक्रिया सक्तीची करण्यात आली आहे. यासाठी https://ladakibahin.maharashtra.gov.in या अधिकृत संकेतस्थळावर ऑनलाईन e-KYC सुविधा उपलब्ध करून देण्यात आली आहे.
ही प्रक्रिया स्वतःच्या मोबाईलवरूनही सहज करता येणार असून, यामध्ये आधार प्रमाणीकरणाद्वारे लाभार्थ्यांचे सत्यापन केले जाणार आहे. महिला व बालविकास मंत्री आदिती तटकरे यांनी येत्या *दोन महिन्यांच्या आत ही प्रक्रिया पूर्ण करण्याचे आवाहन लाभार्थ्यांना केले आहे.
महिलांच्या सक्षमीकरणासाठी योजना
राज्यातील महिलांच्या आर्थिक स्वातंत्र्य, आरोग्य व पोषणात सुधारणा, तसेच कुटुंबातील त्यांची निर्णायक भूमिका भक्कम करण्याच्या उद्देशाने ही योजना राबवली जात आहे. योजनेअंतर्गत थेट लाभ हस्तांतरण (Direct Benefit Transfer – DBT) प्रणालीद्वारे महिलांना आर्थिक सहाय्य दिले जाते.
e-KYC प्रक्रियेअंती लाभार्थ्यांचे आधार प्रमाणीकरण करण्यात येणार असून, यामुळे भविष्यात इतर शासकीय योजनांचा लाभ मिळवणेही अधिक सोपे होईल, असेही मंत्री तटकरे यांनी सांगितले.
फसवणुकीपासून सावधगिरी बाळगावी
यासंदर्भात कोणतीही आर्थिक मागणी करणाऱ्या व्यक्तींना पैसे देऊ नयेत, अशी सूचना देत कोणत्याही भ्रमात न पडता अधिकृत संकेतस्थळाचा वापर करावा , असा सल्लाही त्यांनी दिला.
राज्यभरातील लाखो लाभार्थिनींसाठी ही प्रक्रिया आवश्यक असून, योजनेच्या लाभासाठी आवश्यक त्या सर्व औपचारिकता पूर्ण करण्याचे आवाहन शासनाकडून करण्यात आले आहे.
