ठाणे : ठाकरे गटाचे विभागप्रमुख प्रदीप पूर्णेकर यांच्या हत्येच्या घटनेला 28 दिवस उलटूनही संबंधितांवर ठोस कारवाई झालेली नसल्याचा आरोप करत त्यांच्या कुटुंबीयांनी आणि समर्थकांनी मंगळवारी ठाण्यात आंदोलन केले. माजी महापौर मिनाक्षी शिंदे आणि त्यांचे पती राजेंद्र शिंदे यांना अटक करण्याची मागणी आंदोलकांनी केली. या आंदोलनामुळे शहरातील अनेक रस्त्यांवर मोठी वाहतूक कोंडी झाली.
प्रदीप पूर्णेकर यांचा मुलगा राम पूर्णेकर हा उपमुख्यमंत्री एकनाथ शिंदे यांच्या निवासस्थानाबाहेर आंदोलन करण्यासाठी निघाला होता. मात्र, पोलिसांनी त्याला आधीच ताब्यात घेऊन नौपाडा पोलीस ठाण्यात नेले. त्यानंतर ठाकरे गट आणि मनसेचे नेते पोलीस ठाण्यात दाखल झाले. पूर्णेकर कुटुंबीयांनीही पोलीस ठाण्याबाहेर आंदोलन सुरू केले. मध्यरात्रीनंतर हे आंदोलन स्थगित करण्यात आले.
दरम्यान, घोडबंदर रोडवरील मानपाडा, कापूरबावडी आणि बाळकुम नाका परिसरात समर्थकांनी रास्ता रोको केला. काही ठिकाणी टायर जाळून वाहतूक रोखण्यात आली. यामुळे कोलशेत रोडसह मुंबई-ठाणे ते गुजरातच्या दिशेने जाणाऱ्या आणि येणाऱ्या मार्गांवर वाहतुकीचा खोळंबा झाला. परिस्थिती नियंत्रणात आणण्यासाठी पोलिसांनी पहाटेच्या सुमारास बळाचा वापर करून आंदोलकांना रस्त्यावरून हटवले. मानपाडा परिसरात पोलिसांवर दगडफेक झाल्याची माहिती सूत्रांनी दिली. सध्या परिस्थिती शांत असून रस्ते वाहतुकीसाठी खुले करण्यात आल्याचे सांगण्यात आले.
या प्रकरणावर प्रतिक्रिया देताना प्रदीप पूर्णेकर यांच्या पत्नी विजेता पूर्णेकर यांनी 17 लाख रुपयांचा उल्लेख करत गंभीर आरोप केले. विजेता पूर्णेकर यांनी एकनाथ शिंदे यांच्यावर गंभीर आरोप केले आहेत. “17 लाखांचा विषय पुढे करून आम्हाला विकत घेता येईल, असा त्यांचा समज होता. 17 लाखांचा वकील असल्याचेही सांगितले जात होते. पूर्णेकर कुटुंब 17 लाखांत विकले जाईल, असे त्यांना वाटले. पूर्णेकर कुटुंबाच्या जीवाची किंमत त्यांनी 17 लाख रुपये लावली. एवढ्या रकमेत मांडवली होईल, असा त्यांचा समज होता. शिंदे साहेबांनीच त्याला मांडवली करण्यासाठी पाठवले होते,” असे विजेता पूर्णेकर यांनी म्हटले.
दरम्यान, पूर्णेकर यांना न्याय मिळावा या मागणीसाठी गुरुवारी सायंकाळी 5 वाजता ठाण्यात सर्वपक्षीय आंदोलन आयोजित करण्यात आले आहे. या आंदोलनात आदित्य ठाकरे आणि संजय राऊत सहभागी होणार असल्याची माहिती आहे. भाजपचे स्थानिक पदाधिकारीही सहभागी होण्याची शक्यता वर्तवण्यात आली आहे.
