मुंबई: सणासुदीच्या काळात सोने खरेदीचा विचार करणाऱ्या ग्राहकांसाठी दिलासादायक बातमी आहे. भाऊबीजेच्या दुसऱ्याच दिवशी सोन्याच्या दरात मोठी घसरण झाली असून, प्रति तोळ्यामागे तब्बल २,१८० रुपयांची कपात झाली आहे. त्यामुळे सोन्याचा दर १ लाख ३९ हजार ८०० रुपयांवर आला आहे. गेल्या काही महिन्यांपासून सातत्याने वाढणाऱ्या सोन्याच्या किमतींमुळे सर्वसामान्य ग्राहकांचे बजेट कोलमडले होते. मात्र, या घसरणीमुळे खरेदीदारांना काहीसा दिलासा मिळाला आहे.
काही महिन्यांपूर्वी सोन्याच्या दराने प्रति १० ग्रॅम १ लाख ५० हजार रुपयांचा टप्पा ओलांडला होता. त्यामुळे लग्नसराई, सणासुदीचे दिवस आणि इतर शुभकार्यासाठी दागिने खरेदी करणाऱ्या ग्राहकांना मोठा आर्थिक भार सहन करावा लागत होता. आता दरात झालेल्या घसरणीमुळे दागिने बनवण्याचा विचार करणाऱ्या कुटुंबांना काहीसा फायदा होऊ शकतो.
सोन्याच्या किमतीत मोठी घसरण झाली असली, तरी चांदीच्या दरात मात्र कोणताही मोठा बदल झालेला नाही. गुड रिटर्न्सने दिलेल्या माहितीनुसार, सध्या १०० ग्रॅम चांदीचा दर २० हजार रुपये आहे. त्यामुळे सोन्याच्या तुलनेत चांदीचे दर स्थिर असल्याचे दिसत आहे.
दरम्यान, आगामी काही दिवसांत सोने आणि चांदीच्या किमतीत पुन्हा चढ-उतार होण्याची शक्यता आहे. आंतरराष्ट्रीय बाजारातील घडामोडी, मागणी आणि पुरवठा यांसारख्या घटकांचा मौल्यवान धातूंच्या दरांवर परिणाम होऊ शकतो. त्यामुळे सोने आणखी स्वस्त होणार का, याकडे ग्राहकांचे लक्ष लागले आहे.
२४ कॅरेट सोन्याचे आजचे दर
– १ ग्रॅम : १३,९८० रुपये
– ८ ग्रॅम : १,११,८४० रुपये
– १० ग्रॅम : १,३९,८०० रुपये
– १०० ग्रॅम : १३,९८,००० रुपये
२२ कॅरेट सोन्याचे आजचे दर
– १ ग्रॅम : १२,८१५ रुपये
– ८ ग्रॅम : १,०२,५२० रुपये
– १० ग्रॅम : १,२८,१५० रुपये
– १०० ग्रॅम : १२,८१,५०० रुपये
१८ कॅरेट सोन्याचे आजचे दर
– १ ग्रॅम : १०,४८५ रुपये
– ८ ग्रॅम : ८३,८८० रुपये
– १० ग्रॅम : १,०४,८५० रुपये
– १०० ग्रॅम : १०,४८,५०० रुपये
