मुंबई : एसटी महामंडळातील सुमारे 86 हजार कर्मचाऱ्यांच्या वेतनवाढीचे थकीत हप्ते देण्यासाठी शासन कटिबद्ध असून त्यासाठी 100 कोटी रुपये तातडीने मंजूर करण्यात आले आहेत, अशी माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली. फेब्रुवारी महिन्याच्या वेतनासोबत थकीत हप्ता कर्मचाऱ्यांच्या बँक खात्यात जमा होईल, असे त्यांनी स्पष्ट केले.
एसटीकडे निधीअभावी थकीत वेतन देणे शक्य नसल्याने शासनाने हस्तक्षेप करावा, अशी भूमिका यापूर्वी मांडण्यात आली होती. उपमुख्यमंत्री एकनाथ शिंदे यांनी मुख्यमंत्री देवेंद्र फडणवीस आणि तत्कालीन उपमुख्यमंत्री अजित पवार यांच्याशी चर्चा करून दरमहा सुमारे 65 कोटी रुपये अनुदान देण्याचा निर्णय घेतला होता. त्यानुसार डिसेंबरपासून थकीत हप्ते देण्यास सुरुवात झाली. मात्र काही तांत्रिक अडचणींमुळे फेब्रुवारीत निधी उपलब्ध न झाल्याने कर्मचाऱ्यांमध्ये नाराजी निर्माण झाली.
या पार्श्वभूमीवर काही कामगार संघटनांनी 24 फेब्रुवारीला आंदोलनाचा इशारा दिला होता. परिस्थिती गंभीर होत असल्याचे लक्षात घेऊन मंत्री सरनाईक यांनी शासनाकडे 210 कोटी रुपयांची मागणी केली. त्यापैकी 100 कोटी रुपये तत्काळ देण्यात आले असून उर्वरित निधीही लवकरच उपलब्ध होईल, असे त्यांनी सांगितले. कोणत्याही परिस्थितीत थकीत हप्ते दिले जातील, असा ठाम शब्द त्यांनी दिला.
दरम्यान, सध्या दहावी-बारावीच्या परीक्षा सुरू असल्याने विद्यार्थ्यांच्या प्रवासात अडथळा निर्माण होऊ नये, यासाठी संघटनांनी आंदोलन स्थगित करावे, असे आवाहनही त्यांनी केले. एसटी ही राज्यातील लाखो नागरिकांची जीवनवाहिनी असल्याने आर्थिक अडचणींवर कायमस्वरूपी तोडगा काढण्याची गरज असल्याचे मतही व्यक्त केले जात आहे.
