मुंबई: मागच्या महिन्यात आरसीएफ (Crime News) पोलिसांनी मुंबईच्या चेंबूर परिसरातील (Mumbai News) युवान स्पा सेंटरवर छापा टाकला होता. या कारवाईदरम्यान सेक्स रॅकेट उघडकीस आले होते आणि थायलंडमधील 8 तरुणींची सुटका करण्यात आली होती. मात्र आता या प्रकरणात मोठा धक्कादायक खुलासा झाला आहे. छापा मारताना पोलिसांसोबत गेलेल्या एका व्यक्तीनेच, त्यावेळी एका थायलंडच्या तरुणीसोबत गैरवर्तन केल्याचा गंभीर आरोप समोर आला आहे. पीडित तरुणीने पोलिसांकडे तक्रार दाखल केल्यानंतर हा प्रकार उघडकीस आला असून, पोलिसांनी या प्रकरणाचा तपास सुरू केला आहे. (Mumbai Crime)
मिळालेल्या माहितीनुसार, 27 ऑक्टोबर रोजी युवान थाई स्पावर पीटा अंतर्गत कारवाई करण्यात आली होती. त्यावेळी ग्राहक, व्यवस्थापक आणि कर्मचारी यांना ताब्यात घेण्यात आले होते. सुटका केलेल्या थायलंडच्या महिलांना सुधारगृहात पाठवण्यात आले होते. मात्र या घटनेनंतर जवळपास महिनाभरानंतर, या रेडदरम्यान काम करणाऱ्या 38 वर्षीय स्पा थेरेपीस्टने 24 तारखेला सांताक्रूझ पोलिस ठाण्यात तक्रार नोंदवली.
तिच्या तक्रारीनुसार, छाप्याच्या दिवशी संबंधित व्यक्तीने संध्याकाळी 5.45 वाजता एक तासाची डीप टिश्यू थेरेपी बुक केली होती. मसाज सुरू असताना त्या व्यक्तीने अश्लील स्पर्श करण्यास सुरुवात केली. विरोध केल्यावर त्याने ‘माझ्याशी शरीरसंबंध ठेव नाहीतर महाग पडेल’ म्हणत धमकावले आणि स्वतःला प्रभावशाली असून पोलिसांशी संबंध असल्याचे सांगून खोट्या केसमध्ये अडकवण्याची भीती दाखवली. त्यानंतर त्याने जबरदस्ती करण्याचा प्रयत्न केला आणि तिला विवस्त्र केले. काही वेळात तिघे अनोळखी व्यक्ती खोलीत आले आणि त्यांनी त्या अवस्थेतील फोटो व व्हिडिओ काढले. त्यानंतर सर्वजण तेथून निघून गेले, असा आरोप करण्यात आला आहे.
विशेष म्हणजे, छापा टाकण्यापूर्वी आरसीएफ पोलिसांनी बोगस ग्राहक म्हणून याच व्यक्तीला आत पाठवले होते, अशी माहिती समोर आली आहे. या प्रकरणात सांताक्रूझ पोलिसांनी झिरो एफआयआर नोंदवून पुढील तपास सुरू केला आहे.
