मुंबई: मुंबईतील ताडदेव परिसरात एका उच्चभ्रू सोसायटीत (Crime News) अत्यंत धक्कादायक (Mumbai News) घटना समोर आली आहे. या सोसायटीच्या सिक्युरिटी गार्डने सोसायटीत खेळणाऱ्या एका 9 वर्षाच्या लहान मुलावर लैंगिक अत्याचार केल्याचा प्रकार उघडकीस आला आहे. ही घटना रविवारी दुपारच्या सुमारास घडली असून, ताडदेव पोलिसांनी आरोपीला तात्काळ अटक केली आहे.
रविवारी सुट्टी असल्यामुळे सोसायटीतील लहान मुले सोसायटीच्या ग्राउंडमध्ये खेळत होती. याच दरम्यान सोसायटीचा सिक्युरिटी गार्ड विरेंद्र रामजी राय हा त्या 9 वर्षाच्या मुलाजवळ गेला. त्याने मुलाचे गाल ओढले, त्याला मिठी मारली आणि त्याच्या पॅन्टमध्ये हात घालून गुप्त अंगाला स्पर्श केला. त्यानंतर आरोपी गार्डने मुलाला मीटर रूममध्ये नेले आणि दरवाजा आतून बंद करून पुन्हा मारहाण केली. या घटनेबद्दल कोणालाही सांगितल्यास त्याचे पाय तोडण्याची त्याने धमकी दिली.
घाबरलेल्या मुलाने कसाबसा गार्डच्या तावडीतून स्वतःची सुटका करून घरी धाव घेतली. घरी गेल्यावर त्याने घडलेला सगळा प्रकार आपल्या पालकांना सांगितला. या घटनेने संतप्त झालेल्या पालकांनी ताडदेव पोलीस ठाण्यात सिक्युरिटी गार्ड विरोधात तक्रार दाखल केली.
पोलिसांनी पीडित मुलाच्या पालकांच्या तक्रारीवरून आणि मुलाच्या जबाबानुसार आरोपी गार्डवर भारतीय न्याय संहिता कलम 127(2) आणि 351(3) तसेच POCSO कायद्याच्या कलम 4, 6 आणि 8 अंतर्गत गुन्हा दाखल केला आहे. तक्रार दाखल झाल्यानंतर मुलाला वैद्यकीय तपासणीसाठी जेजे रुग्णालयात नेण्यात आले. पोलिसांनी आरोपी गार्डला अटक केली असून त्याला सध्या पोलीस कोठडीत ठेवण्यात आले आहे आणि या प्रकरणाचा पुढील तपास सुरू आहे.
