मुंबई : शरद पवार गट आणि अजित पवार गटाच्या राष्ट्रवादी काँग्रेसमधील विलीनीकरणाच्या चर्चांना पुन्हा वेग आला असतानाच राज्याच्या राजकारणात आणखी एक घडामोड समोर आली आहे. सुनेत्रा पवार यांच्या नेतृत्वाखालील राष्ट्रवादी काँग्रेसमधील २० ते २२ आमदार पक्ष सोडण्याच्या तयारीत असल्याचा दावा ठाकरे गटाचे खासदार संजय राऊत यांनी केला होता. या दाव्यानंतर गेल्या दोन दिवसांत सुनेत्रा पवार यांच्या कार्यालयातून राष्ट्रवादीच्या सर्व आमदारांना फोन करण्यात आल्याची माहिती समोर आली आहे. त्यामुळे राष्ट्रवादीच्या राजकीय वर्तुळात चर्चांना उधाण आले आहे.
मिळालेल्या माहितीनुसार, गेल्या दोन दिवसांपासून विधानसभेतील राष्ट्रवादीच्या आमदारांशी संपर्क साधला जात आहे. पक्षातील सध्याच्या घडामोडी, दोन्ही राष्ट्रवादी गटांच्या विलीनीकरणाबाबतची चर्चा आणि आमदारांची भूमिका जाणून घेण्याचा प्रयत्न या फोनद्वारे केला जात असल्याचे सांगितले जात आहे.
दोन्ही राष्ट्रवादी काँग्रेस गटांचे विलीनीकरण योग्य वाटते का? शरद पवार यांच्या गटाकडून खरोखर संपर्क साधण्यात आला आहे का? पक्षातील सध्याच्या परिस्थितीबाबत आमदारांचे मत काय आहे? अशा प्रश्नांच्या माध्यमातून आमदारांची भूमिका जाणून घेतली जात असल्याची माहिती एका आमदाराने नाव न सांगण्याच्या अटीवर दिल्याचे वृत्त आहे.
खासदार संजय राऊत यांनी सुनेत्रा पवार यांच्या नेतृत्वाखालील राष्ट्रवादी काँग्रेसमधील २० ते २२ आमदार कोणत्याही क्षणी पक्ष सोडू शकतात, असा दावा केला होता. हे आमदार शरद पवार यांच्या संपर्कात असल्याचेही त्यांनी म्हटले होते. या दाव्यामुळे दोन्ही राष्ट्रवादी गटांमधील राजकीय हालचालींकडे लक्ष वेधले गेले आहे.
राऊत यांनी आपल्या वक्तव्यात अजित पवार यांच्या नेतृत्वावरही टीका केली. संबंधित आमदार शरद पवार यांची भेट केवळ अनौपचारिक गप्पांसाठी घेत नसल्याचे सांगत, ते पुन्हा स्वगृही परतू शकतात किंवा अन्य पक्षांमध्ये प्रवेश करू शकतात, असे त्यांनी म्हटले. सुनेत्रा पवार यांच्या नेतृत्वाखालील राष्ट्रवादी काँग्रेस आणि एकनाथ शिंदे यांचा पक्ष भाजपच्या प्रभावाखाली असल्याची टीकाही राऊत यांनी केली.
एकीकडे दोन्ही राष्ट्रवादी काँग्रेस गटांच्या विलीनीकरणाबाबत चर्चा सुरू असल्याचे सांगितले जात आहे, तर दुसरीकडे आमदारांची मते जाणून घेण्यासाठी संपर्क साधला जात असल्याची माहिती समोर आली आहे. त्यामुळे सुनेत्रा पवार यांच्या कार्यालयाकडून पक्षातील आमदारांची भूमिका समजून घेण्याचा प्रयत्न सुरू आहे का, असा प्रश्न उपस्थित होत आहे.
मात्र, २० ते २२ आमदार पक्ष सोडणार असल्याच्या संजय राऊत यांच्या दाव्याला किंवा आमदारांच्या फोनवरील चर्चांना अधिकृत दुजोरा मिळालेला नाही. त्यामुळे राष्ट्रवादी काँग्रेसमधील पुढील राजकीय घडामोडी आणि विलीनीकरणाबाबत दोन्ही गटांची भूमिका काय राहणार, याकडे राजकीय वर्तुळाचे लक्ष लागले आहे.
