मुंबई : राज्यातील विविध खात्यांतील भ्रष्टाचाराच्या (Bribe News) घटनांमुळे सर्वसामान्य नागरिकांमध्ये तीव्र नाराजी व्यक्त होत असतानाच आता मुंबईतून पुन्हा एक धक्कादायक प्रकार समोर आला आहे. मालाड येथील कुरार पोलीस ठाण्यात लाचलुचपत प्रतिबंधक विभागाने (ACB) मोठी कारवाई करत वरिष्ठ पोलीस निरीक्षक संजीव तावडे आणि पोलीस उपनिरीक्षक ज्ञानेश्वर जुन्ने यांना लाच स्वीकारताना रंगेहात अटक केली आहे. न्यायालयाने दोघांना 23 फेब्रुवारीपर्यंत पोलीस कोठडी (Crime News) सुनावली आहे. (Mumbai News)
मिळालेल्या माहितीनुसार, एका फिर्यादी वकिलाविरोधात दाखल होऊ घातलेल्या फसवणूक आणि लैंगिक शोषणाच्या तक्रारीवर गुन्हा नोंद करू नये, यासाठी संबंधित अधिकाऱ्यांनी तब्बल 3 लाख रुपयांची लाच मागितली होती. तक्रारदाराने याबाबत एसीबीकडे धाव घेतल्यानंतर सापळा रचण्यात आला. त्यानुसार बुधवारी कारवाई करण्यात आली.
या प्रकरणात आधीच 2 लाख रुपये स्वीकारण्यात आल्याचे समोर आले आहे. उर्वरित 1 लाख रुपये स्वीकारताना एसीबीच्या पथकाने दोन्ही अधिकाऱ्यांना रंगेहात पकडले. कारवाईदरम्यान पोलिसांच्या केबिनची झाडाझडती घेण्यात आली असता तब्बल 6 लाख 34 हजार रुपये रोख रक्कम आढळून आली. ही रक्कम नेमकी कशासाठी होती, याचा तपास एसीबीकडून सुरू आहे.
एसीबीने न्यायालयाकडे अधिक सखोल चौकशीसाठी 5 दिवसांच्या पोलीस कोठडीची मागणी केली होती. न्यायालयाने ती मान्य करत 23 तारखेपर्यंत दोघांना पोलीस कोठडी सुनावली आहे. संबंधित अधिकाऱ्यांनी यापूर्वीही अशा प्रकारचे व्यवहार केले असण्याची शक्यता व्यक्त केली जात असून त्यांच्या आर्थिक व्यवहारांची चौकशी केली जाणार आहे.
गेल्या काही महिन्यांत विविध खात्यांतील लाचखोरीच्या घटना उघडकीस येत आहेत. काही दिवसांपूर्वी मंत्रालयातील अन्न व औषध प्रशासन विभागातील लिपिकालाही लाच घेताना रंगेहात पकडण्यात आले होते. अशा घटनांमुळे “पैसे दिल्याशिवाय काम होत नाही” ही भावना अधिक बळावू लागली आहे.
दरम्यान, कुरार पोलीस ठाण्यातील या कारवाईनंतर पोलीस दलातील प्रतिमेवर प्रश्नचिन्ह निर्माण झाले असून, एसीबीने भ्रष्टाचाराविरोधातील मोहीम आणखी तीव्र करण्याचे संकेत दिले आहेत. पुढील तपास सुरू आहे.
