Solapur : जिल्ह्यातील सर्वात मोठी असलेली बार्शी नगरपालिका भाजप नेते राजेंद्र राऊत यांनी पुन्हा एकदा आपल्या ताब्यात ठेवली आहे. 2016 मध्ये शिवसेनेच्या धनुष्यबाण चिन्हावर मोठा विजय मिळवत त्यांनी नगरपालिका जिंकली होती. मात्र गेल्या वर्षी झालेल्या विधानसभा निवडणुकीत त्यांना सुमारे 6 हजारांहून अधिक मतांनी पराभव स्वीकारावा लागला होता. लोकसभेला बार्शीतून महाविकास आघाडीला मोठा लीड आणि विधानसभेला ठाकरे गटाचे दिलीप सोपल विजयी झाल्यामुळे यावेळी नगरपालिका निवडणूक खूपच चुरशीची ठरणार, हे आधीच स्पष्ट होतं. (Solapur)
अखेर या निवडणुकीत राजेंद्र राऊत यांनी जोरदार कमबॅक केलं आहे. बार्शी नगरपालिकेत भाजप–महायुतीचे तब्बल 23 नगरसेवक निवडून आले आहेत. त्यामध्ये भाजपचे 17 आणि शिवसेना शिंदे गटाचे 6 उमेदवार विजयी झाले आहेत. तर ठाकरे गटाच्या शिवसेनेला 19 जागांवर समाधान मानावं लागलं असून त्यांना विरोधी बाकावर बसावं लागणार आहे.
नगराध्यक्षपदासाठी भाजपच्या तेजस्विनी कथले यांनी 4639 मतांच्या फरकाने मोठा विजय मिळवला. त्यामुळे विद्यमान आमदार दिलीप सोपल यांना बार्शीकरांनी स्पष्ट धक्का दिल्याचं चित्र आहे आणि शहरावर पुन्हा भाजपची सत्ता आली आहे.
विशेष म्हणजे, विधानसभा निवडणुकीतील पराभवानंतर राजेंद्र राऊत यांनी आधी कृषी उत्पन्न बाजार समिती आणि आता नगरपालिका निवडणूक जिंकत आपली ताकद पुन्हा दाखवून दिली आहे. काही दिवसांपूर्वी बाजार समितीच्या निवडणुकीत राऊत यांच्या नेतृत्वाखाली बळीराजा विकास आघाडीने 18-0 असा एकतर्फी विजय मिळवला होता. त्यावेळी रणवीर राऊत आणि राजेंद्र राऊत यांची गळाभेट आणि भावुक क्षणांचा व्हिडिओ सोशल मीडियावर चांगलाच व्हायरल झाला होता.
नगरपालिकेचा निकाल लागल्यानंतर बार्शीत राऊत समर्थकांनी मोठा जल्लोष केला. विजयानंतर बोलताना राजेंद्र राऊत म्हणाले, “विधानसभा निवडणुकीत आम्हाला पराभव पत्करावा लागला होता, पण बाजार समिती आणि नगरपालिका निवडणुकीत ती कसर भरून काढली. तालुक्यातील आणि शहरातील जनतेचे मनापासून आभार. रात्रंदिवस मेहनत करणाऱ्या कार्यकर्त्यांना हा विजय समर्पित करतो. आता सहापैकी सहा जिल्हा परिषद आणि 12 पैकी 12 पंचायत समित्या जिंकण्याचा आमचा निर्धार आहे.”
दरम्यान, मुख्यमंत्री देवेंद्र फडणवीस यांनीही राजेंद्र राऊत यांना फोन करून अभिनंदन केलं आहे. बार्शी नगरपालिकेवर भाजपची एकहाती सत्ता आल्याबद्दल त्यांनी बार्शीकरांचे आभार मानले असल्याची माहिती मिळते.
