Satara : सातारा जिल्ह्यातील कराड येथे गाजलेल्या यशवंत सहकारी बँक घोटाळा प्रकरणात अखेर मोठी घडामोड घडली आहे. मुख्य आरोपी शेखर चरेगावकर याला आर्थिक गुन्हे शाखेने मध्यरात्री विंग गावातून ताब्यात घेतले. दीर्घकाळ फरार असलेल्या चरेगावकरचा शोध सुरू होता. तो सहकार परिषदेचा माजी अध्यक्ष असून या प्रकरणातील प्रमुख सूत्रधार मानला जातो. यापूर्वी त्याचा दत्तक भाऊ विठ्ठल कुलकर्णी याला अटक करण्यात आली होती.
या प्रकरणात Yashwant Cooperative Bank मधून तब्बल 112 कोटी रुपयांहून अधिक रकमेची अफरातफर झाल्याचा आरोप आहे. 12 ऑक्टोबर 2025 रोजी सुमारे 50 जणांविरोधात कराड पोलिस ठाण्यात गुन्हा दाखल झाला. काही दिवसांपूर्वी Enforcement Directorate ने चरेगावकर यांच्या बंगल्यावर आणि बँकेच्या फलटण शाखेवर छापे टाकले होते.
दरम्यान, बँकेची आर्थिक स्थिती ढासळल्याने Reserve Bank of India (RBI) ने बँकेवर निर्बंध कायम ठेवले आहेत. बँकिंग नियमन कायदा 1949 अंतर्गत कलम 35A व 56 च्या तरतुदींनुसार 29 नोव्हेंबर 2025 पर्यंत लागू असलेले निर्बंध प्रथम 28 फेब्रुवारी 2026 पर्यंत वाढवण्यात आले. आता हे निर्बंध 28 मे 2026 पर्यंत वाढवले आहेत.
या निर्देशांनुसार ठेवीदारांना त्यांच्या खात्यातील संपूर्ण रक्कम काढता येणार नाही. बहुतांश खात्यांसाठी 10,000 रुपयांपर्यंतची मर्यादा लागू आहे. RBI ने स्पष्ट केले आहे की ही मुदतवाढ म्हणजे बँकेची आर्थिक स्थिती सुधारली असा अर्थ नाही; उलट सार्वजनिक हित जपण्यासाठी हे पाऊल उचलले आहे.
या कारवाईमुळे हजारो ठेवीदारांचे पैसे अडकले असून स्थानिक पातळीवर संताप व्यक्त होत आहे. चरेगावकरच्या अटकेनंतर तपासाला वेग येण्याची शक्यता आहे. मात्र ठेवीदारांसाठी खरी कसोटी अजून संपलेली नाही. पुढील काही महिने बँकेच्या भवितव्याचा निर्णय ठरवणारे ठरणार आहेत.
