Rupali Thombare : उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसमधील पुण्याच्या नेत्या रुपाली पाटील ठोंबरे या गेल्या काही दिवसांपासून सतत चर्चेत आहेत. महिला प्रदेशाध्यक्षा रुपाली चाकणकर यांच्याशी त्यांचा सुरू असलेला संघर्ष आणि त्यानंतर पक्षातील पदांचा दिलेला राजीनामा यामुळे त्या नाराज असल्याची चर्चा होती. त्यामुळे पुढे त्या कोणत्या पक्षात जाणार, याबद्दल राजकीय वर्तुळात अनेक तर्क-वितर्क सुरू होते. (Rupali Thombare)
अशातच रुपाली ठोंबरे यांनी फेसबुकवर केलेल्या पोस्टने पुन्हा एकदा राजकीय खळबळ उडवली. त्यांनी दोन फोटो शेअर करत आपल्या विरोधकांना टोला लगावला आणि भविष्यातील राजकीय दिशेबद्दल सूचक इशाराही दिला.
रुपाली ठोंबरे पोस्ट :- (Rupali Thombare post)
ठोंबरे म्हणाल्या, ”पहिला फोटो 2005 सालचा आहे. तेव्हापासून मी समाजात आणि राजकारणात स्वतःच्या ताकदीवर काम करतेये. दुसरा फोटो महाराष्ट्रातील दोन दिग्गज नेते-हिंदुहृदयसम्राट बाळासाहेब ठाकरे आणि शरद पवार यांचा आहे. त्यामुळे आयरे-गैरे लोकांनी आम्हाला शिकवू नये,” अशी त्यांची कडक प्रतिक्रिया होती.
त्यांनी पोस्ट केलेल्या फोटोंमध्ये एकीकडे शरद पवार आणि दुसऱ्या फोटोत बाळासाहेब ठाकरे-शरद पवार दिसत असल्याने, त्या अजित पवारांच्या गटातून बाहेर पडून शरद पवारांच्या राष्ट्रवादीत जाणार का, अशा चर्चांना जोर आला आहे.
तसंच काही दिवसांपूर्वी त्यांनी उपमुख्यमंत्री एकनाथ शिंदे यांच्या पुत्र आणि शिवसेना खासदार श्रीकांत शिंदे यांची भेट घेतल्याचीही चर्चा आहे. त्यामुळे त्या शिवसेनेत जाण्याची शक्यता देखील व्यक्त केली जात आहे. त्यांनी आजच्या पोस्टमध्ये बाळासाहेब ठाकरे यांचा फोटो टाकल्याने ही चर्चा अधिकच रंगत चालली आहे.
दरम्यान, राष्ट्रवादीकडून पुणे शहराच्या नव्या कार्यकारिणीत त्यांना दिलेल्या ”नवीन जबाबदारी”बाबत पसरलेल्या बातम्यांना ठोंबरे यांनी स्पष्ट उत्तर दिलं. त्या म्हणाल्या, ”माझी शहर कार्याध्यक्षपदी नियुक्ती अजित पवार साहेबांनी सहा महिन्यांपूर्वीच केली आहे. नव्या कार्यकारिणीत मला काही नवीन पद देण्यात आलेलं नाही,” असं त्यांनी माध्यमांना सांगितलं.
