मोहाली: पंजाबमधील मोहाली (Rana Balachauria Case) भागात एका खासगी कबड्डी सामन्याच्या ठिकाणी एक अत्यंत वाईट घटना समोर आली आहे. या ठिकाणी खेळाडू राणा बलाचौरिया यांची गोळीबार करून हत्या करण्यात आली. गोळीबार करण्यापूर्वी हल्लेखोर सेल्फी काढण्याच्या बहाण्याने खेळाडूंच्या जवळ गेले होते. राणा बलाचौरिया थांबताच त्यांनी अचानक गोळीबार केला मोटरसायकलवर आलेल्या 2 ते 3 अनोळखी लोकांनी त्यांना लक्ष्य केले आणि त्यांच्यावर गोळ्या झाडल्या. बलाचौरिया यांच्या छाती आणि चेहऱ्याच्या भागावर 4 ते 5 गोळ्या लागल्या, ज्यामुळे ते जागीच कोसळले.
या हल्ल्यानंतर त्यांना तातडीने मोहालीच्या फोर्टिस रुग्णालयात दाखल करण्यात आले, पण उपचारादरम्यान त्यांचा मृत्यू झाला. या घटनेने कबड्डी जगतात खळबळ माजली आहे. हल्लेखोरांचा शोध घेण्यासाठी पोलीस सीसीटीव्ही फुटेज आणि सोशल मीडियावरच्या ॲक्टिव्हिटीचा आढावा घेत आहेत. दरम्यान, या हत्येची जबाबदारी स्वीकारणारी एक पोस्ट सोशल मीडियावर व्हायरल झाली आहे. या पोस्टमध्ये बंबीहा गँगने ही हत्या केल्याचा दावा केला असून, प्रसिद्ध गायक सिद्धू मूसेवाला यांच्या हत्येचा बदला घेण्यासाठी ही हत्या करण्यात आल्याचे म्हटले आहे.
सोशल मीडियावर व्हायरल झालेल्या पोस्टमध्ये डोनी बाल शगनप्रीत, मोहब्बत रंधावा, अमर खेवा प्रभदासवाल आणि कौशल चौधरी यांची नावे दिसत आहेत. या पोस्टमध्ये असा दावा केला आहे की, राणा बलाचौरिया लॉरेन्स बिश्नोई यांच्या गटासोबत काम करत होता आणि त्याने सिद्धू मूसेवालाच्या मारेकऱ्यांची मदत केली होती. याच कारणामुळे ही हत्या करण्यात आली. दरम्यान, बंबीहा टोळीने इतर खेळाडूंना धमकी दिली आहे. जग्गू खोटी आणि हॅरी टॉट यांच्या टीमसोबत कोणीही संबंध ठेवू नये, अन्यथा त्यांना गंभीर परिणाम भोगावे लागतील, असे या पोस्टमध्ये म्हटले आहे. मात्र, पोलिसांनी या सोशल मीडिया पोस्टमध्ये किती सत्यता आहे, याची खात्री केलेली नाही.
